• Advirten que “SEA e Zona Franca queren levarse todos os beneficios e non asumir ningún risco, só unha parte do investimento. Desde logo que fan un negocio redondo a costa do Goberno socialista de Cuntis”.
• “O convenio está montado sobre uns cálculos económicos irreais, con graves deficiencias. Isto demostra que os aumentos de obra que asumirá o Concello de Cuntis serán millonarios”.
O PP advirte que o Goberno local pretende aprobar no pleno de mañá, xoves, o convenio con SEA e co Consorcio Zona Franca de Vigo para desenvolver o polígono 1 da RAN cunhas “condicións nefastas” para Cuntis, que poden provocar “unha catástrofe económica aínda máis grave da que soporta actualmente o concello”.
A voceira popular e candidata á alcaldía, Isabel Couselo, afirma que “o documento obriga aos veciños de Cuntis a asumir todos os aumentos de obra, indemnizacións e cantos riscos xurdan na operación, algo inasumible para o noso concello debido ás grandes débedas que ten e á complicada situación económica que atravesa”. Por iso insiste en reclamar ao alcalde “que recapacite, que se impoña ao seu partido e defenda os intereses dos veciños eliminando estas cláusulas e asinando un bo convenio para Cuntis”.
Di que basta con modificar e corrixir o documento para que SEA e Zona Franca asuman estes riscos da operación, “xa que tamén van ser os propietarios de todo o solo industrial que se poña á venta na Ran. Queren levarse todos os beneficios e non asumir ningún risco, só unha parte do investimento. Desde logo que fan un negocio redondo a costa do Goberno socialista de Cuntis”.
Ademais, explica que o convenio ten outras deficiencias: “non se fixan os prezos de venta das parcelas, polo tanto, non sabemos si seremos competitivos, e conta con numerosas cláusulas que permiten botar abaixo o convenio en calquera momento”.
Couselo critica que “estas dúas entidades non están dispostas a asumir os excesos e imprevistos, e o alcalde tampouco foi quen de impoñerse”. Para ela, “esta tiña que ter sido unha condición innegociable para asegurar o polígono e polo ben dos veciños”.
Ademais, di que “canto máis acceso á documentación temos, máis nos preocupa a situación e as consecuencias que poida provocar este convenio. Está montado sobre uns cálculos económicos irreais, con graves deficiencias. Isto demostra que os aumentos de obra que asumirá o Concello de Cuntis serán millonarios. Lamentablemente, o tempo daranos a razón, pero será tarde para poñerlle freo”. A no ser que, continúan os populares, “a firma deste convenio sexa papel mollado, sexa un anuncio electoralista e quede en fume”.
Nesta liña, cuestiona a capacidade de xestión de David Regades, o secretario xeral do PSOE provincial, ao fronte de Zona Franca, “que deixou de ser un instrumento de promoción económica, industrial e do emprego para converterse noutro aparato máis de propaganda política dos socialistas na provincia”, e recorda que dos 39,2M€ que tiña Zona Franca nos orzamentos para 2022, só están executados 6,7M€. Están deixando sen investir 8 de cada 10 euros. Prometen e non fan absolutamente nada”.