● A oposición votou en contra de dúas actas por non ter nomeada á secretaria pola Dirección Xeral da Administración Local, polo que as medidas aprobadas nese pleno poderían quedar sen efecto.
● Aprobouse a Conta Xeral cos votos en contra do Partido Popular, xa que “unha vez máis se fai incumprindo todos os prazos establecidos”.
● O PP abstense na aprobación do Plan de Saneamento, “que o goberno se viu obrigado a redactar para subsanar a súa neglixencia que levou ao Estado a intervir as contas municipais.”
● A oposición tamén optou pola abstención na derogación das tasas polo uso dos velatorios para pasar a ser prezo público.
O Concello da Cañiza celebrou no día de onte, o Pleno Ordinario correspondente ao mes de Novembro, no que o goberno socialista encabezado por Luís Piña, se “viu acorralado” polo voceiro da oposición.
A sesión comezou co voto en contra por parte dos populares, da aprobación de dúas actas dun pleno anterior, xa que ao ter que ser sustituida a secretaria titular por outra persoa, esta non contaba co nomeamento oficial por parte da Dirección Xeral da Administración Local antes da celebración do mesmo, nin tampouco se pediu a convalidación despois de ter rematado. Isto deixaría sen efecto as medidas que se aprobaron nese momento.
O goberno socialista aproba por maioría, pero cos votos en contra do Partido Popular, a Conta Xeral, que segundo indica Miguel Domínguez, “volve a facelo incumprindo todos os prazos establecidos demostrando unha vez máis a súa incompetencia en materia económica”.
Domínguez explica que o seu grupo se abstivo na votación para aprobar un Plan de Axuste que afirma “tería que ter aprobado fai un ano cando nos o pedimos nun pleno extraordinario ao igual que a dimisión do alcalde e da concelleira de facenda, porque entendíamos que había que facelo para acollerse ás condición que ofrecía o Ministerio de Hacienda e ter evitado así o embargo que sufrimos actualmente. Piña negouse a facelo aínda que era consciente de que a consecuencia sería a intervención das contas por parte do Estado, coa única intención de obter un rédito político e evitar explicar en plena campaña electoral que ía ter que subir os impostos e que todas as inversión que prometeu non as ía levar a cabo.
O Partido Popular entende que a decisión de subir ou non o prezo do uso dos velatorios é do alcalde e por este motivo, optaron tamén, pola abstención na votación.
Durante o turno de rogos e preguntas houbo momentos de tensión nos que, segundo o voceiro popular, o alcalde se puxo á defensiva ao verse contra as cordas ante a cita que ten no xulgado nos vindeiros días por un posible delito de prevaricación administativa que lle podería acarrear unha posible inhabilitación para a actividade de cargo público.
Nun momento de desesperación e enfado, o propio Luís Piña, vociferaba que quedaba totalmente prohibido o acceso ao concello, e reclamaba a Domínguez que se tivese persoado cun notario para levantar unha acta que daba conta da falta de transparencia do rexedor e pola que se atopa actualmente imputado.
