O Partido Popular de Cuntis esixe seriedade ao Alcalde nas súas declaracións e que non engane ós veciños con promesas que el sabe que non vai levar a cabo, coa única pretensión de evadir responsabilidades e culpar a outra administración de cometidos que son exclusivamente municipais.
O Alcalde pode esixirlle á Administración autonómica os prazos que considere, pero os populares tamén lle impoñen ao Goberno local que deixe de confundir aos veciños. Segundo a voceira Isabel Couselo, “as competencias están claras, o Concello non pode levar a cabo obras de humanización nunha estrada que non é municipal, polo tanto coas declaracións feitas en días pasados minte deliberadamente e a conciencia. Pero o que si pode e debe é resolver os problemas dos servizos como o saneamento, de responsabilidade exclusivamente municipal, e pagar os máis de 800.000 euros que se deben por traballos e encargos desde hai cinco anos. Iso si que sería facer os deberes”.
Os populares de Cuntis manteñen a súa postura e apostan pola humanización da rúa do Convento, pero esixíndolle ó Grupo de Goberno que asuma as súas obrigas e comece a traballar xa, renovando o saneamento e demais servizos, que é o primeiro que hai que facer. Do contrario sería, como ben di o Alcalde “empezar a casa polo tellado”.
Para o PP todo o acontecido pon de manifesto a falta de xestión e capacidade de negociación do Grupo de Goberno nos últimos anos. Cuntis precisa integrar dentro do núcleo urbano certos tramos, como a rúa do Convento, rúa da Palma ou circunvalación Don Aurelio e darlle o tratamento que merecen. Para iso o Concello debería comezar por solicitar a transferencia deses tramos, asumilos como municipais, e xestionar eses traspasos do xeito mais produtivo e intelixente para Cuntis. E ata o momento non se fixo nada diso, o que si se fixo foi encargar traballos sabendo que non hai diñeiro para pagalos, endebedando aínda mais a empresas, autónomos e ó propio Concello.
Todo isto é unha mostra mais da manipulación e falta de transparencia á que nos ten acostumado o Grupo de Goberno. Proba diso é o acontecido co último Pleno. O grupo de Goberno tarda 15 días en dar acceso ás imaxes ós grupos da oposición e ademais elimínase a maior parte do Pleno, impedindo ós veciños escoitar a situación real do noso Concello e as declaracións dos grupos da oposición.