• Os populares valoran o anuncio efectuado polo conselleiro de Sanidade na súa visita ao hospital do Salnés, na que avanzou as prazas que se convocarán nesta comarca
• Pablo Leiva lamenta a postura de PSdeG e BNG, que se opuxeron á lei que vai permitir incorporar este novo persoal á sanidade do concello.
O Partido Popular do Grove celebra a decisión tomada pola Xunta de incluír unha praza de médico e un pediatra no centro de saúde deste concello, dentro do concurso de méritos que a Xunta convocará nas vindeiras semanas, tal e como anunciou o conselleiro de Sanidade.
Esta convocatoria de máis de 400 prazas, avanzada este mes polo Presidente Rueda, realizarase a través da Lei 2/2022 de medidas extraordinarias para a provisión de postos de difícil cobertura, aprobada o pasado outubro no Parlamento co voto en contra de BNG e PSdeG.
Esta lei incentiva a cobertura destas prazas ao ofrecer o maior nivel de estabilidade laboral, obtendo unha praza fixa en propiedade, cun sistema de acceso máis sinxelo e áxil: un concurso de méritos que non require exame de oposición e que se resolve nuns meses.
O candidato popular á alcaldía, Pablo Leiva, lamentou a postura de PSdeG e BNG lembrando que, se por eles fora, non se podería realizar este proceso e cubrir estas prazas. No mesmo sentido, criticou ao alcalde por encabezar protestas e reclamacións de máis persoal sanitario mentres o seu partido vota en contra das solucións.
Unha postura partidista que só se explica desde o intento de sacar rédito electoral dos problemas de déficit de médicos de familia e pediatras que existen en toda España, ata o punto de intentar boicotear medidas innovadoras da Xunta como este concurso. “No Grove teremos novo médico e novo pediatra co voto en contra do partido do alcalde”, concluíu.
