• Domínguez pregunta a Carmela Silva se as estradas provinciais “niqueladas” ás que se refire son estas, nas que centos de usuarios teñen que sortear a diario, dende hai meses, un enorme buraco
O deputado provincial do Partido Popular, Miguel Domínguez, xunto á voceira do PP de Mondariz, Ana Corredoira, visitaron hoxe Mondariz para denunciar a situación das estradas que a Deputación de Pontevedra ten neste municipio e reclamar que, dunha vez por todas, se tomen medidas para garantir a seguridade viaria.
Hai meses, os populares estiveron en Mondariz para reclamar á Deputación, sen éxito, a mellora urxente da estrada que vai dende O Val ata Covelo. Hoxe o fan dende o lugar de Cernadelo onde un enorme socavón de dous metros de profundidade na EP-4306 pon en risco aos veciños e veciñas que cada día circulan por ese lugar.
“Este burato leva case un ano sen ser arranxado, poñendo en perigo a seguridade dos usuarios”, denuncia Domínguez, “O mal estado do firme, a falta de mantemento e socavóns como este, convirten estas estradas nunha verdadeira proba de obstáculos”. Lamentan os populares que a realidade de Carmela Silva e a dos veciños e veciñas do concello de Mondariz, e do groso dos concellos dos rurais da provincia, non coincida. “Este é o exemplo que di Carmela Silva de que as estradas provinciais están niqueladas?”, pregunta o deputado.
Na mesma liña, Corredoira convidou á presidenta da Deputación a visitar Mondariz e a desprazarse polas mesmas estradas polas que teñen que circular os veciños. “Convídoa a vir ata Mondariz e comprobar por si mesma como está o lugar de Cernadelo. Non podemos sair cos nenos, non podemos ir dar unha volta en bici… Isto é un auténtico perigo”, sinala a voceira, “Se non me entende como política, pídolle por favor que me entenda como nai e como avoa e que, de inmediato, solucione esta situación”.
A veciñanza de Mondariz leva anos reclamando que se acondicionen estes viais pero desde o Goberno provincial atoparon sempre o rexeitamento a levalas a cabo. Por iso dende o PP, adiantan que seguirán apoiando aos veciños, e presionando ao bipartito para que se acometan estas melloras.
