• A proposta ten o obxectivo de “potenciar a participación das persoas con discapacidade nas políticas municipais de atención, integración social e calidade de vida”
• A formación traballa, en coordinación coas entidades sociais de Pontevedra, para facer máis proposicións que “nos axuden a dar voz a estes colectivos”
O Partido Popular de Pontevedra instará o goberno local á “posta en marcha inmediata” do Consello Sectorial de Accesibilidade, despois de que as concelleiras Pepa Pardo e Silvia Junco reuníronse coas asociacións Amencer-Aspace, Amizade, AFAPO, ASSEI, CEDDD, Xoán XXIII e XOGA na sede local da formación.
O PP presentou unha moción para “dar voz a estes colectivos que nos axudan a asesorar en ámbitos fundamentais para o avance social de Pontevedra como son as melloras en materia de diversidade funcional, inclusión e accesibilidade universal”.
A proposta do partido máis votado da cidade ten o obxectivo de “potenciar a participación das persoas con discapacidade nas políticas municipais de atención, integración social e calidade de vida”, informou Junco.
O Consello Sectorial de Accesibilidade é un órgano colexiado de participación sectorial, consultivo e non vinculante que forma parte da organización complementaria municipal; cuxo fin é a consulta, asesoramento, fomento e proposta en todos os asuntos que constitúen os obxectivos do mesmo.
Junco incidiu en que “non pode existir unha Pontevedra das persoas se non escoitamos as útiles achegas que fan as entidades sociais” e lamentou que “os concelleiros nacionalistas presumen de ter unha capital de provincia integradora, pero cónstanos, a través de reunións periódicas cos colectivos afectados, que isto non é así”.
O PP reafirmou o seu apoio ás reivindicacións das actividades sociais da Boa Vila e situou a integración das persoas con discapacidade en “unha das nosas prioridades, desde a oposición, para lograr unha inclusión plena. Para iso, “estamos a traballar con todas as entidades para facer máis proposicións”, avanzou.
