• Domínguez tacha de “anomalía democrática” que o Goberno en minoría de Lores desatenda as reivindicacións do pleno municipal, no que están representados todos os pontevedreses
• Pardo considera que retirarlle as competencias ao alcalde ou ao concelleiro nacionalista no que delegue, a favor do pleno, permitirá “que non se tomen decisións políticas coa oposición frontal de veciños e comerciantes”
O Partido Popular de Pontevedra promove unha proposición normativa para modificar o artigo 4 da Ordenanza de Movilidad Amable e de Ordenación de Espazos Públicos do Concello de Pontevedra para lograr a reapertura ao tráfico da avenida Reina Victoria.
Os populares Rafa Domínguez e Pepa Pardo anunciaron unha proposta que ten como finalidade conseguir que corresponda ao pleno municipal “a competencia de ordenar o peche e apertura á circulación rodada, total ou parcial, con carácter definitivo, daquelas rúas e espazos que se estimen oportunos. As prohibicións de circulación de carácter total, permanente e/o definitivo, adoptaranse previa consulta facultativa aos servizos técnicos e de mobilidade”.
O presidente do PP busca unha solución para contrarrestar a “anomalía democrática” instaurada na corporación local desde a investidura do nacionalista #Miguel Anxo Fernández Lores, constituíndo un goberno en minoría do BNG, co apoio do PSOE, que foi “incapaz” de organizar o Pontedetapas, negociar cos traballadores municipais unha nova Relación de Postos de Traballo (RPT) e que, ademais, está a permitir que Pontevedra convértase nunha cidade “máis sucia, máis escura e con maiores problemas de tráfico”.
“O goberno deu as costas aos pontevedreses e ao pleno, que exerce a súa representatividade, despois de que a maioría votásemos a favor da reapertura de Raíña Victoria e do traslado do mercadillo ao centro”, engadiu Domínguez antes de lembrar que o PSOE permitiu ao BNG gobernar con tranquilidade, ao investir a Lores e aprobar as modificacións de crédito dos nacionalistas.
Pola súa banda, a concelleira Pardo presentou os detalles dunha proposición “fundamental” para levar a cabo a modificación puntual do artigo 4 da Ordenanza de Movilidad que permita “outorgarlle ao pleno as competencias e retirarllas ao alcalde, ou ao concelleiro do goberno no que delegue”.
A edil explicou que, despois da presentación desta modificación, o seguinte paso será a elaboración dun informe por parte de secretaría do pleno que levará a ditame a comisión, onde se poderán facer as alegacións pertinentes, antes de someterse ao seu debate e aprobación en pleno. O PP, ao ter maioría, podería aprobalo coa abstención doutro dos partidos.
Segundo informan os populares, a modificación da ordenanza non afecta á estabilidade orzamentaria e responde os principios de necesidade; eficacia; ao tratar de mellorar a normativa anterior; proporcionalidade, ao buscar dotar de maior seguridade xurídica a decisións que afectan de maneira fundamental ao tecido económico e social da cidade; e transparencia, tanto na súa tramitación como no acceso ao instrumento definitivo.
“Un cambio de tráfico que afecta de forma transcendental aos intereses da nosa cidade e dos nosos veciños, non pode estar supeditada á decisión dun alcalde ou dun concelleiro”, concluíu Pardo.
