O Partido Popular de Pontevedra rexistrou unha solicitude para que se celebre unha Comisión de Educación de maneira urxente e extraordinaria: “Debemos ser informados por parte do Goberno do motivo da negativa para asinar o convenio”
As concelleiras do Partido Popular que forman parte da Comisión de Benestar Social, Cultura, Educación e Dinamización Sociocultural (Silvia Xunco, Pepa Pardo e Ana Isabel Vázquez) rexistraron unha petición de convocatoria extraordinaria e urxente da referida comisión tras coñecerse que Pontevedra pode quedar sen ludotecas públicas este verán. O PP esixirá na reunión toda a información relacionada co asunto, tras decatarse a través dos medios de comunicación da falta de acordo entre as partes.
“Non entendemos como o Concello non é capaz de achegar posturas cando tantas familias de Pontevedra dependen deste tipo de actividades para conciliar a súa vida durante o verán”, lembrou Xunco. “Se como di o concelleiro Fernández hai que sacar o diñeiro doutro lado, que o fagan xa”, incidiu.
O vindeiro luns, Xunco reunirase coa Fanpa, co fin de coñecer os detalles da negociación e a postura do organismo que representa aos pais e nais. A situación non é nova, lembrou Xunco, posto que a propia Fanpa xa alertara da posibilidade de non renovar o convenio debido ao incremento dos custos e do salario mínimo profesional. “Esta situación é o resultado da falta de traballo e previsión por parte desta concellería”, recalcou a edil.
Xunco quixo lembrar que o propio Fernández no 2020 dixo, literalmente, “que o PP non só protagoniza un auténtico abandono de funcións nunha materia tan esencial como a Educación, senón que tamén se dedique agora a poñer paus nas rodas da Fanpa para impedir que se celebren as ludotecas”. Xunco agora esixe seriedade e compromiso ao Goberno local e pediulle que de maneira urxente “buscar solucións para a posta en marcha do servizo de ludotecas”.
