· Os populares denuncian o oscurantismo do alcalde sobre o contrato que mantén con Urbaser que leva anos caducado sin que se dea traslado a unha empresa alternativa e cos contedores do rural completamente destrozados e obsoletos
· Os edís esixen que se cumpra cos días de recollida, se desinfecten os contedores que cheiran tras levar meses e meses sin ser lavados pese a que o contrato obriga á empresa a facelo no verán cada 15 días.
O PPdeG de Ponte Caldelas esixiralle ao alcalde Andrés Díaz no vindeiro Pleno que exerza as súas funcións para o que foi elixido e faga seguemento e supervisión do contrato de recollida do lixo no municipio que se atopa nunha grave situación de abandono con contedores no rural destrozados, remendados, con graves problemas de cheiros e salubridade, etc.
Segundo puderon comprobar os edís do PPdeG, en moitos lugares non se están cumprindo incluso as frecuencias de recolida no rural e o lixo acumúlase nos contedores durante días. Esta situación provoca que durante o tempo de calor a veciñanza estea a soportar os malos cheiros procedentes dos residuos que se acumulan.
“Esta situación de abandono vai a peor desde que o goberno municipal leva anos e anos co contrato con Urbaser caducado e sin esixirlle á empresa en ningún momento que cumpra co articulado do contrato que a obriga, entre outras moitas cousas, a facer unha desinfección completa dos contedores cada 15 días en verán e a substituír aos que estean rotos ou en mal estado. Van pasando os meses e os anos e a situación é cada vez máis insostible pese a que se sacou, por segunda vez, a concurso o contrato e non sabemos o porque de que non se sustitúa dunha vez a esta empresa, a segurou o voceiro do PPdeG, Antón Xil.
Os edís do PPdeG pídenlle ao alcalde Andrés Díaz “que faga o seu traballo e supervise á empresa concesionaria e se lle abra un expediente sancionador “por non cumprir o contrato e desatender as súas obrigas. Hai mecanismos para iso e para reconvir á empresa para que cumpra coas súas obrigas. O alcalde ten que xestionar e defender os intereses xerais da veciñanza e non quedarse de brazos cruzados”, sinalou o voceiro popular.
OSCURANTISMO E PRÓRROGAS POLA PORTA DE ATRÁS A URBASER
Os populares denuncian o continuo oscurantismo que rodea este tema que fai que se vaia prolongando sucesivamente e pola porta de atrás as prórrogas dun contrato que non conta coa supervisión e a esixencia debida por parte do equipo de goberno para garantir o seu seguemento e forzar a que Urbaser cumpra coas obrigas que se determinan no pliego e no contrato asinado.
Para o PPdeG existe por parte do grupo de goberno unha “deixadez sospeitosa e inusual” nun servizo que ás claras non está dando a resposta axeitada ás necesidades do municipio e que é motivo de queixa continua por parte da veciñanza.
Andrés Díaz, unha vez chegado ao goberno, mudou por completo de parecer e substituíu a súa intención de remunicipalizar o servizo, como propoñía irresponsablemente cando estaba na oposición, a renunciar na práctica a facer seguemento exhaustivo algún do traballo que fai a empresa para o cal está facultado polas condicións recollidas no pliego de condicións do contrato, ése que di falsamente que “o ten atado”, pero que nembargantes leva prorrogando inxustificablemente e pola porta de atrás desde o ano 2017.
