O Concello de Covelo, en colaboración co Concello da Cañiza, pon en marcha unha nova edición do Programa CLARA, unha iniciativa financiada pola Xunta de Galicia e o Fondo Social Europeo. O obxectivo é promover a igualdade, mellorar a saúde emocional e ofrecer ferramentas de empoderamento laboral e persoal ás mulleres e ás nenas dos dous municipios.
A actividade dará comezo o xoves 31 de xullo cunha charla inaugural a cargo da psicóloga Sonia Suárez Arias, titulada “Saúde mental e muller. Escoitar, entender, sanar”. A sesión poderá celebrarse en horario de mañá ou de tarde, segundo a dispoñibilidade das participantes.
Atención individualizada e confidencial
As mulleres poderán acceder a consultas psicolóxicas e xurídicas gratuítas, previa cita. Este servizo, de carácter individual, poderá realizarse de xeito presencial ou online.
- Atención psicolóxica: xestión emocional, estrés, orientación familiar, autoestima e acompañamento terapéutico.
- Atención xurídica: dereito con perspectiva de xénero, violencia machista, mediación, estranxeiría, discapacidade, entre outros.
Innovación en orientación laboral: uso da intelixencia artificial
A edición 2025 incorpora ferramentas dixitais innovadoras como a intelixencia artificial (IA) para traballar na orientación laboral. Elaboraranse currículos por competencias e habilidades, realizaranse simulacións de entrevistas, e analizarase o mercado laboral coa axuda de ferramentas de IA.
Tamén se impartirá un curso básico de IA baixo o título “IA e algoritmos: quen toma as decisións?”, con prácticas de uso de aplicacións como ChatGPT, Copilot ou Gemini.
Obradoiros de saúde e coidado persoal
- Mindfulness e técnicas de atención plena para convivir co estrés, enfermidades ou carga mental.
- Biodanza, Chi Kung e movemento psicosomático para fortalecer a autoestima e liberar emocións a través do corpo.
- Obradoiros sobre alimentación antiinflamatoria enfocada na menopausia e nutrición sanadora.
Formación en igualdade e cultura crítica
- Módulo formativo “300 anos de feminismo: perspectiva histórica e filosófica”
- Obradoiro “Turbulencias do feminismo: ventres de alugueiro, trata e prostitución”
- Charla sobre o consentemento nas relacións sexuais: agresións, denuncia, prácticas e dereitos ante a xustiza
- “Un café con Clara”: debate sobre moda, suxeición ou liberación? Unha análise histórica e actual sobre o papel da moda nas vidas das mulleres
Promoción STEM para nenas: Voando xuntas
A actividade “Voando xuntas”, prevista para setembro, promoverá as vocacións científicas e tecnolóxicas entre as nenas a través do voo de drons. Procurarase que a participación sexa prioritariamente de nenas de Covelo e A Cañiza, evitando a masificación por parte de visitantes estivais.
Información e citas previas
As actividades desenvolveranse todos os xoves en horario de 9:00 a 14:00 no Centro Médico de Maceira. As consultas son gratuítas e confidenciais.
Citas:
- Sonia (atención psicolóxica): 687 227 495
- María Jesús (atención xurídica e orientación laboral): 606 118 853
