O Concello de Mos informa de que o Punto Limpo Móbil xa está novamente operativo tras completar os traballos de reparación derivados dun acto vandálico que obrigou á suspensión temporal do servizo.
A alcaldesa de Mos, Nidia Arévalo, subliñou que “non imos permitir que comportamentos incívicos freen servizos que son fundamentais para o conxunto da veciñanza. Actuamos con rapidez para restablecer o funcionamento e garantir que Mos siga avanzando en sustentabilidade”.
Arévalo incidiu tamén na importancia da responsabilidade cidadá: “Este punto limpo móbil é unha ferramenta útil, cómoda e pensada para todos. Coidalo é responsabilidade compartida. Cando se dana, pérdese un servizo que beneficia a todo o municipio”.
O servizo, posto en marcha en outubro de 2025, ten como finalidade achegar a recollida selectiva de residuos ás dez parroquias de Mos, evitando desprazamentos e facilitando a correcta xestión de residuos domésticos especiais.
O Punto Limpo Móbil permite depositar, entre outros, pilas e baterías, lámpadas, aceites de cociña usados, pequenos electrodomésticos, roupa e calzado, xoguetes, envases contaminados ou dispositivos electrónicos en desuso.
Pola súa banda, a concelleira de Medio Ambiente, Laura Méndez, destacou que “estamos a consolidar un modelo de xestión máis próximo e eficaz. A boa resposta da veciñanza demostra que este servizo era necesario, e agora toca reforzalo e protexelo”.
Dende o Concello anímase á cidadanía a facer uso deste recurso e a respectar as infraestruturas públicas, clave para avanzar cara a un modelo de economía circular e sostible. Tamén se lembra a importancia de facer un uso responsable dos espazos públicos e de empregar os servizos habilitados para a correcta xestión dos residuos.
O abandono de enseres ou lixo fóra dos puntos autorizados, como colectores ou o propio Punto Limpo Móbil, supón un prexuízo para o entorno e para a convivencia, ademais de poder derivar en sancións conforme á normativa vixente. Neste sentido, apélase á colaboración da veciñanza para manter Mos limpo e coidado entre todos.
Calendario de localizacións do Punto Limpo Móbil
Meses impares (xaneiro, marzo, maio, xullo, setembro, novembro):
• Días 1-5 → Mos (Pazo de Mos)
• Días 6-8 → Cela (Xunto á Igrexa)
• Días 9-11 → Cela (Centro Cultural Herville)
• Días 12-14 → Pereiras (San Rafael)
• Días 15-17 → Pereiras (Centro Cultural Os Castros)
• Días 18-22 → Petelos (Multiusos As Pozas)
• Días 23-26 → Tameiga (Urb. San Eleuterio)
• Días 27-30/31 → Tameiga (Alto Puxeiros)
Meses pares (febreiro, abril, xuño, agosto, outubro, decembro):
• Días 1-5 → Sanguiñeda (Avda. de Sanguiñeda)
• Días 6-8 → Sanguiñeda (Ameiro Longo)
• Días 9-11 → Louredo (Local Social A Cividade)
• Días 12-14 → Louredo / Guizán (Santiaguiño)
• Días 15-17 → Guizán (Plantel)
• Días 18-22 → Dornelas (Local Social)
• Días 23-26 → Torroso (Peinador)
• Días 27-30/31 → Torroso (Centro Dotacional)
