O Concello dará luz verde a este documento no pleno que se celebrará este xoves 29 de maio ás 19.00 horas
A infancia e a adolescencia gañan novo protagonismo da acción municipal do Rosal. O Concello dá un paso firme cara ao futuro coa aprobación en pleno este xoves 29 de maio, ás 19.00 h, do seu primeiro Plan Municipal de Infancia e Adolescencia, un documento clave para garantir o benestar, os dereitos e o desenvolvemento integral das nenas, nenos e adolescentes do municipio.
Este documento, froito do traballo conxunto da Mesa de Coordinación Interna en materia de Infancia e Adolescencia e do Grupo Local de Participación Infantil Fogaric@s, responde a un estudo detallado da situación da cativada e mocidade rosaleira e marca as liñas estratéxicas que guiarán a acción do Goberno local nos vindeiros anos.
“O noso obxectivo é construír un Concello con e para as nosas nenas, nenos e adolescentes. Queremos escoitalos, incluílos e facerlles partícipes das decisións que afectan á súa vida cotiá. Non se trata só de protexer os seus dereitos, senón de garantir que poidan exercelos plenamente”, destaca a alcaldesa Ánxela Fernández Callís, que sinala que este plan é tamén un chanzo máis para converter ao Rosal en Cidade Amiga da Infancia.
O Plan Municipal de Infancia e Adolescencia establece un marco de actuación para deseñar políticas públicas adaptadas ás necesidades reais da infancia e adolescencia, fomentando a súa participación activa na vida do municipio. Entre os seus obxectivos destacan:
- Promover o respecto e a protección dos dereitos da infancia e adolescencia en todas as políticas municipais.
- Mellorar a calidade dos servizos orientados á mocidade (educación, saúde, medio ambiente, deporte, cultura e lecer).
- Crear espazos seguros e inclusivos para o desenvolvemento pleno das nenas, nenos e adolescentes.
- Reforzar a coordinación interinstitucional e avaliar de forma continua o impacto das políticas implementadas.
Con este plan, o Concello dá un novo paso na transformación das políticas públicas, reforzando a implicación do Rosal coas súa infancia e mocidade, construíndo políticas con nenos, nenas e adolescentes e recoñecendo o papel activo das novas xeracións na configuración dunha sociedade máis xusta, igualitaria e sostible.
“O Rosal comprométese con este plan a escoitar, a coidar e a actuar. Estamos convencidas de que unha infancia e adolescencia con dereitos, oportunidades e espazos de participación constrúe unha sociedade máis rica, diversa e cohesionada”, engadiu a rexedora.
A aprobación do PMIA reforza así o camiño iniciado polo Concello para acadar o selo de Cidade Amiga da Infancia de UNICEF, un recoñecemento que avala o compromiso real e sostido do municipio coa defensa dos dereitos das persoas máis novas e co seu protagonismo activo na vida local.
