Grande acollida deste innovador percorrido urbano de 3 km que permitiu descubrir a aquelas tecedoras que construíron O Rosal dende o anonimato
Hai historias que non se contan, pero que merecen ser escoitadas. Con esta premisa botou a andar o innovador roteiro ‘8 Mulleres’, unha iniciativa pioneira que se converteu nun rotundo éxito de participación e que permitiu visibilizar figuras femininas clave na historia do Rosal. Durante un percorrido circular de 3 quilómetros con 8 paradas estratexicamente escollidas, as e os participantes descubriron a contribución esencial de mulleres que foron tecedoras do pasado e do presente do Rosal dende o anonimato.
A alcaldesa do Rosal, Ánxela Fernández Callís, destacou a importancia deste proxecto: “Este roteiro non só rescata nomes e historias, senón que reivindica a pegada das mulleres no noso pasado e a necesidade de seguir traballando pola igualdade no presente e no futuro”. A rexedora salientou ademais a resposta da veciñanza, “xa que foi emocionante ver como tantas persoas se uniron a esta viaxe pola nosa memoria, recoñecendo a forza e o legado das nosas mulleres”.
A iniciativa permitiu explorar diferentes facetas do labor feminino na historia local. Dende as tecedoras de paisaxes referíndose ás mulleres que traballaron a terra, o mar e o río Miño, ata as tecedoras de comunidade e soños, como Rufina Domínguez Trigo, Adela Álvarez Rodríguez ou Xulia Suárez, pioneiras que romperon moldes para traballar polo ben común. Tamén se puxo o foco nas tecedoras da historia, invisibilizadas pese ao seu poder, e nas tecedoras de tradición e futuro, mulleres que mantiveron viva a cultura e impulsaron cambios sociais, como Carmen Piedra, as pandereteiras Tremelique ou Luisa Alonso.
Da man dunha guía especializada, as persoas participantes afondaron na vida de lavandeiras, piscueiras, argaceiras, propietarias de muíños ou mulleres que desafiaron estereotipos en diferentes eidos, como as tendeiras, con mulleres como Marcola, Elda ou Carita como protagonistas. Ademais, o roteiro serviu para propoñer novas iniciativas, como a creación dun rueiro escolar con nomes femininos ou a investigación de mulleres relevantes na industria local.
‘8 Mulleres’ concluíu cunha lembranza especial a todas aquelas investigadoras, escritoras e artistas que hoxe seguen a ser tecedoras de novos saberes, como Vanesa Álvarez e Lorena Arévalo, autoras do mural en homenaxe a Rufina, Adela e Xulia; Irene Silva; Mar Caldas ou as investigadoras María de los Ángeles Verea e Begoña Bas.
O Concello do Rosal reafirma con esta exitosa iniciativa o seu compromiso coa igualdade e coa recuperación da memoria histórica en clave feminista, impulsando proxectos que permitan construír un futuro máis xusto e igualitario para todas e todos.
