Os traballos desenvolveranse na totalidade da estrada, de preto de 6 quilómetros de lonxitude, e consistirán na reposición do firme e na mellora da drenaxe e da sinalización
O presidente da Deputación de Pontevedra, Luis López, anunciou hoxe a aprobación do expediente para contratar as obras de mellora da seguridade viaria na estrada provincial EP-9302 Xil-As Covas-Barrantes, que discorre polos concellos de Meaño e Ribadumia, cun investimento total de preto de 1,3 millóns de euros. “Un proxecto que eu mesmo presentei hai tan só uns días á veciñanza da zona xunto cos alcaldes de ambos concellos”, explicou o presidente provincial.
Nesta estrada é preciso proceder a reposición do firme e mellorar a drenaxe e sinalización, a fin de salvagardar a debida prestación do servizo público viario e de mellorar a seguridade viaria na totalidade de estrada, de preto de 6 quilómetros de lonxitude. Desta maneira, as obras inclúen a limpeza de ambas marxes e cunetas, o saneamento dos firmes, a mellora da drenaxe lonxitudinal, a execución de redutores físicos da velocidade e operacións complementarias de reposición da sinalización vertical e horizontal afectada.
“Avanzamos así no noso compromiso coas estradas provinciais, para garantir o seu óptimo estado e, con isto, a seguridade das nosas veciñas e veciños, de todos os que empregamos estas vías indispensables na vertebración do noso territorio”, confirmou López.
