• Os operarios municipais atenden unha media de entre 15 e 20 solicitudes semanais, levándose diferentes electrodomésticos, mobles, portas e outros enseres que non deben depositarse nos colectores habituais
• O alcalde, Jacobo Pérez, salienta que a utilización desta prestación para particulares é unha evidencia da concienciación que existe entre a veciñanza de Caldas de Reis á hora de preservar e respectar o medio ambiente
O servizo de retirada e recollida de restos voluminosos do Concello de Caldas de Reis traballa a pleno rendemento. O alcalde, Jacobo Pérez, mantivo esta semana unha reunión co edil de Medio Ambiente, Juan Carlos Ortigueira e con operarios municipais para analizar o funcionamento dunha prestación pensada para particulares, a través da cal poden desfacerse de electrodomésticos, mobles e outros enseres de xeito eficiente. Segundo explica Pérez Gulín, a Administración municipal recibe unha media de entre 15 e 20 avisos semanais por parte da veciñanza para dispoñer deste servizo, que debe solicitarse realizando unha chamada previa ao número de teléfono 647574316. A retirada lévase a cabo todos os mércores.
A recollida a domicilio de voluminosos é unha ferramenta moi importante á hora de garantir un tratamento axeitado deste tipo de restos. O Concello de Caldas de Reis estima que se retiran aproximadamente uns 400 metros cúbicos de lixo mensuais a través deste servizo. O alcalde recorda que se trata dunha recollida que “leva xa varios anos operativa e que está a funcionar moi ben. Comprobamos que existe unha concienciación moi importante entre a veciñanza no que ao coidado do medio ambiente se refire, xa que este servizo o que impide é que proliferen os vertidos ilegais”, sinala Jacobo Pérez. Neste sentido, desde a Administración local lémbrase que o feito de abandonar restos de voluminosos na vía pública pode acarrear importantes sancións económicas, polo que o Goberno local anima ás persoas particulares a que se poñan en contacto coa Concellería de Medio Ambiente para resolver calquera dúbida.
Fornos, placas, electrodomésticos, lavadoras, frigoríficos ou microondas son algúns dos aparatos electrónicos que son máis habituais á hora de efectuar as retiradas. Ademais, tamén se recollen residuos máis voluminosos, como son mobles, somieres, portas, colchóns ou marcos, ademais doutros residuos que non deben depositarse no resto de colectores.
Campaña informativa
Por outra banda, Caldas de Reis continúa coa campaña informativa posta en marcha xa hai varias semanas sobre a importancia de preservar o medio ambiente. Ademais das charlas realizadas nos centros educativos e tamén para persoas maiores, centradas en cuestións como a reciclaxe, a finais deste mes de maio tamén se habilitará un punto de información sobre a utilización dos composteiros, tanto individuais como comunitarios. A iniciativa levarase a cabo o día 26, coincidindo coa celebración do mercado ambulante que ten lugar cada luns no casco histórico.
