A cidadanía poderá consultar como están as rúas e aparcadoiros públicos gratuitos a nivel de ocupación en todo momento a través de pantallas na rúa, dunha aplicación móbil e da páxina web do Concello. Tamén se poderá garantir o bo funcionamento das Zonas 2H.
O uso da tecnoloxía é unha ferramenta esencial para ordenar as cidades do futuro. Marín leva tempo traballando neste sentido, xa que a aplicación na vila das estratexias de Smart Mobility é unha das liñas de inversión que se contemplan dentro de Marín Dusi, proxecto cofinanciadao nun 80% polo Fondo Europeo de Desenvolvemento Rexional da Unión Europea.
Esa Smart Mobility ten, sobre todo, un pilar fundamental: poder axudar na ordenación do tráfico e do estacionamento en todo o espazo urbano, dando información en tempo real á cidadanía. Esa é a base deste proxecto, que tal e como informou esta mañá o Goberno local, está xa na fase final de validación de datos e dos sistemas informáticos que se porán en marcha, para que o proxecto poida estar dispoñible para a veciñanza este mesmo verán.
Coñecer o estado da conxestión do tráfico nas principais vías urbanas e cal é o nivel de ocupación do estacionamento, tanto nas rúas como nos aparcadoiros públicos gratuitos habilitados por todo o centro, será a información que se publique de maneira constante e en tempo real para que as persoas poidan buscar de xeito máis sinxelo onde aparcar o coche.