• O pasado miercoles día 10 de novembro os alcaldes de Arbo, Horacio Gil, e das Nieves, Xosé Manuel Rodríguez, mantiveron unha reunión en liña co Director Xeral de Calidade e Avaliación Ambiental, D. Ismael Aznar Cano
• Horacio Gil e Xosé Manuel Rodríguez reiteran novamente a oposición frontal dos dous concellos ao proxecto da Liña de Alta Tensión ( LAT 400 K).
Os alcaldes de Arbo, Horacio Gil, e das Neves, Xosé Manuel Rodríguez, mantiveron este mércores unha reunión en liña co Director Xeral de Calidade e Avaliación Ambiental, D. Ismael Aznar Cano, dependente do Ministerio para a Transición Ecolóxica e o Reto Demográfico, para tratar, de novo, o proxecto da Liña de Alta Tensión ( LAT 400 K) que afecta aos dous concellos.
O Director Xeral de Calidade e Avaliación Ambiental, D. Ismael Aznar Cano transmitiu aos dous alcaldes que aínda non hai resolución sobre o trazado final da liña Fontefría- Fronteira Portuguesa, para a cal existen dúas alternativas que afectarían, ben ás parroquias de Sela e Barcela, en Arbo, ou á de Vide nas Neves.
En calquera das dúas opcións, a liña pasaría próxima a algunhas casas e a espazos protexidos, polo que se están avaliando afeccións sobre saúde e medio ambiente, ademais os impactos sobre a viticultura e o efecto na paisaxe da zona.
A decisión, antes de finais de ano
O Director Xeral de Calidade e Avaliación Ambiental, D. Ismael Aznar Cano adiantou que prevían que puidese producirse unha resolución antes de finais deste ano, unha vez que finalice a avaliación de impacto ambiental, e comprometeuse a manter, logo, unha nova reunión cos dous concellos para explicarlles as razóns da mesma, mentres que quedou sobre a mesa analizar as características técnicas que poidan mellorar a seguridade do tendido, en especial nos tramos que pasen preto das vivendas.
Oposición frontal dos dous concellos
Horacio Gil e Xosé Manuel Rodríguez, reiteraron a oposición de Arbo e As Neves aos dous posibles trazados, e insistiron nas alegacións presentadas, así como na demanda, repetida nos últimos anos, dos veciños e veciñas das dúas vilas. Así mesmo, lamentaron que, neste momento non haxa outras alternativas a estes dous proxectos e mostraron a súa preocupación polo feito de que o Goberno español non se manifestou en relación coa decisión, reiterada hai poucas semanas, polo Goberno de Portugal de manter o trazado da alta Tensión por Sela.