Os nacionalistas acusan ao alcalde de centrarse nos
últimos 20 anos en promover exclusivamente a construción de segundas residencias e inmobles de luxo, consolidando “guetos para ricos” no concello
A falta de vivenda para todo o ano en Sanxenxo obrigou a un gran número de persoas, especialmente mozos e mozas, a marchar do concello, recordan desde o Bloque
Os datos do censo municipal para demanda de vivenda pública, con máis de medio milleiro de persoas anotadas, é a proba real e evidente do fracaso da política de formigón e cemento de Telmo Martín. Así o entende o grupo municipal do Bloque Nacionalista Galego (BNG) de Sanxenxo, que acusa ao rexedor de promover durante décadas unha xestión urbanística co único obxectivo de “crear guetos para ricos no municipio”, deixando de lado unha necesidade de primeira orde, como é o acceso a unha vivenda durante todo o ano para a veciñanza, especialmente no que se refire a xente moza.
Os nacionalistas sinalan que os datos do censo “non poden supoñer unha sorpresa para ninguén, tendo en conta o éxodo de mozos e mozas que nos últimos anos tiveron que marchar de Sanxenxo para poder vivir, ao non existir aquí unha demanda minimamente suficiente de vivendas para todo o ano”. Esta situación é consecuencia da política de Telmo Martín, tal e como denuncia o Bloque. “O único obxectivo do alcalde foi promover a construcións de chales e inmobles pensados para segunda residencia. A demanda de vivendas para todo o ano sempre existiu, pero o señor Martín non tivo escrúpulos en priorizar unha oferta pensada só para as clases máis altas ou cun maior nivel adquisitivo”, sinala o voceiro do BNG, Fran Leiro, que recorda que os prezos destas vivendas son totalmente inalcanzables para persoas cun soldo medio.
O Bloque ten claro que este censo non é máis ca unha cortina de fume promovida polo Partido Popular para intentar agochar unha realidade indebatible: en máis de 20 anos Telmo Martín non foi quen de promover a construción dunha soa vivenda pública. “Puideron moitos máis as súas ansias especulativas e unha política urbanística chea de cemento e formigón na que os intereses e as necesidades da veciñanza de Sanxenxo non se tiveron en conta”, critican os nacionalistas. Esta situación tamén afecta de xeito directo a sectores como a hostalería, xa que a falta de vivenda dificulta, en moitas ocasións, as contratacións de persoal, ao non existir opcións de aloxamento para persoas de fóra do municipio interesadas en traballar nalgún negocio local.
O BNG ten claro que ese medio milleiro de persoas que solicitan vivenda pública, son, en realidade, “moitas máis”, xa que “probablemente os inscritos son xente que vive en parella ou coa súa familia” e lamenta que Telmo Martín provocase e acentuase a eiva de vivenda pública ata convertela “nun mal endémico”. Por isto, os nacionalistas advirten de que “non imos tolerar que o señor Martín volva enganar á veciñanza como xa fixo nos últimos 20 anos, nos que, entre outras ‘fazañas’, “o alcalde gastou miles de euros na creación da empresa públcia Ínsula Sanxenxo, promovida supostamente para desenvolver vivenda pública e sen realizar unha soa actuación neste eido en dúas décadas”.
Por último, o Bloque tamén lembra que é a Xunta de Galicia, gobernada polo Partido Popular, a que debe implicarse na construción de vivenda pública, algo que non fixo en Sanxenxo. “Esta é unha proba máis do nulo peso político de Telmo Martín fóra do concello. Non é quen de lograr que as administracións nas que goberna o seu propio partido dean resposta ás necesidades máis acuciantes da veciñanza”, conclúen os nacionalistas.
