• As primeiras actuacións leváronse a cabo en dez núcleos pertencentes a diferentes parroquias e retomaranse na primavera
• O alcalde, Jacobo Pérez, lembra que o Concello de Caldas de Reis incrementou nun 40% o orzamento destinado a este contrato, cunha contía que ascende a 90.000 euros, IVE engadido
O resultado da aposta do Concello de Caldas de Reis por sacar adiante un novo contrato para a posta a punto e limpeza de vías no rural do municipio empeza a ser xa visible. O alcalde, Jacobo Pérez, vén de pasar revista a varias das zonas nas que a empresa adxudicataria xa procedeu á realización dos primeiros labores de mantemento e retirada de restos. Desde principios de ano actuouse nun total de 10 núcleos en diferentes parroquias da vila termal, abarcando unha extensión que supera os 30 quilómetros. En concreto, os lugares nos que procedeu xa a realizar esta primeira parte do traballo son Paradivas, A Baxe, Cacote, Santiaguiño, Calvelos, Aldea de Saiar, Sequeiros, A Grela, Cesar e Cesariños.
Segundo precisou Pérez Gulín, leváronse a cabo tarefas de limpeza e de retirada de maleza, ramas de árbores e outros restos, ben de xeito manual ou coa utilización de camións e palas. O alcalde caldense explicou, ademais, que na primavera retomaranse este tipo de actuacións, que se levan a cabo a ambos marxes das vías do rural. Para entón, contarase tamén cun tractor para efectuar desbroces a maior escala. Jacobo Pérez incide na importancia destas tarefas, xa que axudan a garantir o bo estado das vías e das cunetas, o que facilita unha maior seguridade tanto para peóns e viandantes, así como para os condutores. As condicións meteorolóxicas rexistradas nos últimos meses fixeron que estes traballos fosen especialmente intensos nalgúns puntos, nos que que procedeu á limpeza e retirada de restos e polas de árbores para evitar atascamentos e asolagamentos de auga. Hai que lembrar que o Concello de Caldas de Reis incrementou nun 40% aproximadamente o orzamento destinado para a licitación destes traballos, que contan cunha partida de 90.000 euros, IVE engadido. O alcalde recalcou que o feito de sacar este contrato “garante a realización deste servizo de xeito periódico e permite ter o rural no estado que demanda a veciñanza. Hai que ter en conta que Caldas de Reis conta cunha superficie duns 70 quilómetros cadrados, un espazo demasiado amplo para que poida ser abarcado unicamente a través dos operarios municipais”.
