O cortexo fúnebre sairá ás 21:30 horas desde a Praza do Concello e dirixirase, acompañado polo público provisto de velas, ata a sucursal de Abanca
Os veciños de Campo Lameiro continúan coas súas protestas contra a decisión unilateral da Dirección de Abanca de pechar a única oficina bancaria existente no municipio. Na mañá de hoxe o centro da vila amaneceu cheo de esquelas convidando á veciñanza a asistir ao “velorio” na honra da sucursal que, previsiblemente, deixará de estar operativa o mércores 8 de setembro.
O cortexo fúnebre, acompañado por veciños e veciñas de Campo Lameiro portando unha vela ou un cirio (que aportará o Concello aos participantes), ten previsto arrancar sobre as 21:30 horas da noite desde a Praza do Concello para dirixirse ata a sucursal de Abanca onde terá lugar o sepelio e a liturxia da palabra.
Os concentrados escoitarán un emotivo responso especialmente elaborado para poñer de manifesto os prexuízos e os problemas que suporán para os veciños e veciñas de Campo Lameiro e dos demais concellos afectados polo peche de oficinas bancarias a perda deste tipo de servizos.
ENTREVISTA CON OUTRAS ENTIDADES BANCARIAS
Por outra banda, o alcalde de Campo Lameiro, Carlos Costa, en nome de toda a Corporación Municipal comenzou xa a enviar solicitudes de entrevista con responsables de zona doutras entidades bancarias coa intención de expoñerlles a situación na que queda o concello e explorar posibilidades de colaboración que finalicen coa implantación dunha oficina ou un axente bancario no municipio que permita á veciñanza seguir contando cos servizos bancarios.