O Consello Local do BNG discrepa do modo no que o Goberno local está a xestionar a praga do picudo nas palmeiras que forman parte do parque arborístico do concello. Nun primeiro momento, o Goberno afirmou que ía deixar morrer as palmeiras do Paseo das Palmeiras, anexo á Calzada, polo elevado custo de mantemento. Agora anuncia a súa sustitución por outro tipo de palmeiras.
Ante iso, debemos manifestar o seguinte:
1) A variedade que queren implementar, a Washingtoniana, non se parece en nada ás palmeiras canarias do paseo de Cambados. É unha palmeira longa e estreita, que se asocia a rexións como California. Vai a mudar por completo a fachada costeira cambadesa e, como non dá sombra, o parque perderá a súa función de espazo de refresco os días de calor, e de freno do vento cando hai mal tempo.
2) Esa variedade tamén é susceptible de ser polinizada polo picudo, co que non solucionan o problema de fondo.
3) Os expertos consideran que a praga do picudo está remitindo. Nalgunhas partes do Estado xa foi eliminada. E, cada vez máis, parece que se están illando e controlando os focos. Estamos en fase descendente, e non é descabelado ver pronto a súa fin.
4) O Goberno local alega que o custo de manter o Paseo das Palmeiras é de 14.000,00 € máis IVE. Pero iso non é certo. Esa contía é polo tratamento de todas as palmeiras municipais, non só as dese parque; inclúe tamén as da Biblioteca Municipal, as da Praza do Concello, as da Praza de Alfredo Brañas, e as do Pazo de Torrado. E, de todas esas, había catro perxudicadas no parque, e a da Praza do Concello. O tratamento do picudo é inócuo para o medio ambiente, co que tampouco hai motivos ambientais parar opoñerse a que se continúe dando. A decisión é, desde o punto de vista económico, un completo disparate.
5) O custo de cada palmeira ronda os 3.000 €. E, por retirada de cada unha, sobre 600 €. O Goberno acaba de anunciar que comprou quince palmeiras por 14.700 €. Esa cifra é difícil de crer, e parece que omiten os gastos de retirada.
6) Pero, inda así, tampouco se recuperaría o estadio previo. Cambados conta con dúas palmeiras excepcionais, difícilmente atopables, e que merecerían ser protexidas como parte do noso patrimonio natural; unha de oito, e outra de once cabezas. Son árbores peculiares que singularizan o palmeiral cambadés fronte a outros, e que merecen ser conservadas.
7) Por último, e ao marxe do económico, histórico, ou pragmático, está o valor paisaxístico e sentimental. As palmeiras forman parte da vila de Cambados dende hai medio século, e están ligadas a recordos, anécdotas, e vivencias de milleiros de cambadeses ao longo das últimas décadas. Ao marxe do valor natural, económico, ou histórico, só por elo merecen respeto e coidado.