A unidade móbil da Axencia Galega de Doazón de Sangue estará o vindeiro luns 30 de marzo na rúa Ramón Franco de 16.00 a 21.00 h
O Rosal achega a súa pinga de solidariedade antes de marchar de Semana Santa cunha nova visita dunha das unidades móbiles da Axencia Galega de Doazón de Sangue, Órganos e Tecidos (ADOS). O autobús estará no concello o vindeiro luns 30 de marzo aberto a todas aquelas persoas que desexen doar e deixar unha vez máis a súa pinga de solidariedade. A unidade móbil estará na rúa Ramón Franco número 4, diante da sucursal de Abanca, e abrirá as súas portas de 16.00 a 21.00 horas.
Aínda que nestes intres hai reservas de todos os grupos sanguíneos, dende ADOS fan un chamamento a seguir doando para mantelas para seguir atendendo a todas as necesidades que se presentan. As persoas que desexen doar sangue poderán solicitar máis información chamando ao teléfono gratuíto 900 100 828.
Para participar neste proceso, que apenas dura 10 minutos, debe terse máis de 18 anos e pesar máis de 50 kg. As persoas doantes deberán ir despois de almorzar se acoden pola mañá ou dúas horas despois de xantar ao mediodía se acoden pola tarde. É imprescindible levar a tarxeta de doazón, o DNI ou un documento similar, ademais de informar ao médico en caso de estar tomando algún medicamento.
Ademais das 10 unidades móbiles que se desprazan cada día, a Axencia Galega mantén abertos sete puntos fixos nos principais hospitais galegos na procura de doazóns de sangue que despois son procesadas e preparadas para atender as necesidades diarias de milleiros de doentes os 365 días do ano. Os hospitais galegos precisan ente 400 e 500 doazóns de sangue cada día, arredor de 10.000 ao mes, para garantir a asistencia a todas as persoas que o necesitan.
