En 10 meses, o actual Goberno do Concello de Mondariz, encabezado por Pablo Barcia, do Partido Popular, non executou ningunha obra. O Plan + Provincia de 2024 atópase aprobado pola Deputación de Pontevedra e estaba destinado a realizar o saneamento da parroquia de Vilasobroso; á compra de material para servizos sociais (incluido un coche); material para o concello (sinais, contenedores, compactadora…); obras na parroquia de Riofrío, Frades, Lougares, Meirol… Máis estas obras non están, e Alternativa por Mondariz non sabe se se esperan.
Ademáis destas obras relativas ao Plan + Provincia de 2024, había outras previstas para facer entre este ano e o pasado, que a día de hoxe tamén se encontran sen executar. Un exemplo son as relativas ao campo de fútbol, que están paradas e non se sabe cando se irán retomar e finalizar.
O goberno de Alternativa por Mondariz deixara falado e negociado coa Consellería de Turismo da Xunta de Galicia e coa Comunidade de Montes de Toutón a realización da Senda da Levada, que xa contaba con partida orzamentaria para a súa execución, pero a día de hoxe non sabemos en que situación se atopa.
Non se aprecia ningún tipo de interese por parte do actual goberno, e parece que a folla de ruta leva a ningures, xa que tampouco hai intención de realizar un presuposto nin de regularizar a situación económica do Concello, que é realmente preocupante. Ao descrito hai que sumarlle que actualmente está gastado máis do 80% do presuposto, o que pode levar a Mondariz a unha situación económicamente complexa.
En termos xerais, a xestión cotiá estase vendo relentizada, chegando incluso á parálise.
Un exemplo disto son os tempos que se manexan para a concesión dunha licencia municipal, porque non hai substituto para o Secretario de carreira. En palabras do propio portavoz de AporM: “Isto é un tirar cara adiante. O alcalde está máis preocupado pola imaxe que se proxecta nas redes sociais, que polas necesidades reais dos veciños, que parece descoñecer”.
