- A actuación realizouse en seis tramos ata completar un total de case 2500 metros cadrados de novo firme
- O Concello de Pazos de Borbén acaba de finalizar os traballos de asfaltado e acondicionamento no camiño de Merouces- Cachopeira, na parroquia de Cepeda. A mellora, financiada a través da Xunta de Galicia, inclúe a renovación da capa de rodadura e regularización de cunetas nun camiño de case un quilómetro de lonxitude e tivo un custo de 29.975,01 euros.
- Os traballos de asfaltado dividíronse en seis tramos para evitar cortes prolongados de tráfico e molestias prolongadas aos usuarios da vía. Entre as tarefas realizadas estaba a roza e limpeza das cunetas, marxes e tubos para a condución de pluviais ademais dunha regularización previa do firme e o realce das tapas de rexistro situadas na calzada.
- En total a mellora dotou de 2.429 metros cadrados de novo firme á rede viaria municipal coa intención de aumentar a seguridade e confortabilidad do tráfico ademais de previr os problemas que poidan ocasionar as choivas.
- O alcalde de Pazos de Borbén, Andrés Iglesias, agradeceu ao ente autonómico a súa achega para poder levar a cabo esta mellora destacando que “os pequenos camiños son fundamentais para a mobilidade de moitos veciños e os municipios do rural temos unha gran cantidade de pequenas estradas con moi pouco orzamento para mantelas, polo que toda axuda é ben recibida”, finalizou o rexedor