- A iniciativa busca promover entre a mocidade do municipio o uso do galego no ámbito literario
- O Concello de Pazos de Borbén, a través da biblioteca municipal, organiza por terceira vez o seu Certame de Relato Curto. Un concurso escolar que busca potenciar a expresión e a comprensión escrita en galego ademais de fomentar o seu uso no ámbito literario. O prazo de presentación de orixinais abrirase o 1 de outubro e finalizará o 15 de novembro.
- O certame está centrado no ámbito educativo polo que só poderán participar os alumnos residentes no Concello de Pazos de Borbén que estean a cursar estudos de primaria ou secundaria nalgún dos centros educativos do municipio.
- O concurso contará con cinco categorías en función do curso escolar que estea a cursar cada participante. Os alumnos de 1º e 2º de primaria entrarán na categoría A, os de 3º e 4º no B, e así sucesivamente ata os alumnos de 3º e 4º da ESO que participarán no grupo E. Todos os escolares que participen recibirán un libro de agasallo.
- Ademais, cada categoría premiará as dúas mellores composicións con lotes de libros e libros electrónicos. A iniciativa está incluída no programa municipal de dinamización de actividades en lingua galega e conta co patrocinio da Deputación de Pontevedra.