A verbena nocturna contará as actuacións musicais de Manoele de Felisa e o Grupo Fórmula
O Concello de Pazos de Borbén celebra este luns a súa festa patronal en honra a Santa María de Pazos tras dous anos sen celebrarse pola pandemia. A xornada contará cos tradicionais ritos relixiosos e actuacións musicais e finalizará coa clásica verbena na que non faltará a animación musical ademais dos tradicionais postos e atraccións.
A xornada comezará coa celebración dunha misa solemne a partir das 13:00 horas na Igrexa de Santa María de Pazos. A continuación, terá lugar a tradicional procesión na que non faltará a animación musical a cargo da Banda de Música de Arcade. Ás 22:00 horas, na praza do Concello, comezará o concerto de Manoele de Felisa e, a continuación, celebrarase a tradicional verbena nocturna que contará, ademais dos clásicos postos e atraccións, cun baile animado por Grupo Formula.
Historicamente, a organización da celebración das festas patronais de Santa María de Pazos dependeu de varios colectivos. Orixinalmente dependía do consistorio local ata que, a mediados do século pasado, os emigrantes retornados de Brasil fixéronse cargo da festividade dado o seu alto poder adquisitivo. Xa case na década dos 70, xa practicamente sen emigrantes retornados, pasou a mans dos veciños e, tras deixar de celebrarse durante varios anos, en 2019 o goberno local fíxose cargo da súa organización para manter a tradición.
“Manter vivas as nosas tradicións é unha forma de manter con vida a nosa historia”, destacou o alcalde de Pazos de Borbén, Andrés Iglesias, que engadiu que “despois da pandemia os veciños teñen moitas ganas de recuperar as festas tradicionais do verán, é como a confirmación de que todo quedou atrás”, finalizou o rexedor.