• O aparcamento público de Sarmiento Rivera será o punto de saída onde estarán agrupados os catorce equipos participantes no test day
• O tramo test terá lugar no Monte da Picaraña de 9:00 a 13:00 e de 15:00 a 19:00 horas
O aparcamento público da rúa Sarmiento Rivera de Ponteareas acolle mañá martes a partir das 09:00 horas o test day da 57ª edición do rally Rías Baixas.
O Concelleiro de Deportes do Concello de Ponteareas, Luis Rodríguez, explica que ao longo de todo o día catorce equipos do supercampionato de España sairán rumbo á Picaraña para probar os seus vehículos ofrecendo un espectáculo e desfile do deporte do motor. “Recuperamos así un tramo histórico do Rías Baixas que aínda que non estará dentro da competición si volverá a formar parte dunha das probas máis importantes da axenda do motor en España”.
Setenta e catro equipos nos que se atopan dez equipos locais inscritos no apartado autonómico salientando nomes de xente da casa como Jorge Pérez, co seu Porsche 911 GT3; Pablo Pazó, co seu Talbot Sunbeam da categoría de históricos; ou José Calvar, co seu Seat Marbella.
O test day consistirá nun tramo de probas, distinto ao shakedown do venres 5, para realizar os últimos axustes antes do rally. O tramo test terá lugar no Monte da Picaraña, na localidade de Ponteareas, de 9:00 a 13:00 e de 15:00 a 19:00 horas.
Este ano o goberno de Ponteareas destinou por vez primeira unha partida de 12.000€ ao apoio do deporte do motor e os coches locais lucirán o logotipo do Concello así como os cascos de pilotos e copilotos ponteareáns que compiten en equipos de fóra.
A alcaldesa Nava Castro e o concelleiro de Deportes convidan a cidadanía a visitar o parque móbil ubicado en Sarmiento Rivera e a desfrutar do paso dos participantes rumbo á Picaraña.
