O Concello de Pontecesures celebra hoxe sábado o seu patrón San Xulián, festivo local no municipio. Unha xornada que está a ser moi condicionada pola climatoloxía, se ben as fortes choivas caídas nas últimas horas non impediron que o programa previsto da festa se desenvolvera tal e como estaba previsto, cando menos durante a mañá.
Así, a xornada arrincou ás 9:00 horas cun gran disparo de bombas de palenque, que deu paso a unha alborada a cargo das agrupacións folclóricas Algueirada e Xarandeira. A choiva fixo acto de presenza antes de comezar a misa solemne na igrexa parroquial de San Xulián, cantada pola Coral Polifónica de Pontecesures, porén parou minutos antes da tradicional procesión, que puido celebrarse sen ningunha incidencia.
A imaxe de San Xulián, acompañada por medio cento de fieis e distintos integrantes da corporación municipal, co alcalde Juan Manuel Vidal Seage á fronte, deu unha volta polo adro da igrexa acompañada da música da asociación cultural Xarandeira. Unha vez rematada a misa, Xarandeira interpretou varias pezas no adro da igrexa. Para esta tarde está previsto un concerto a cargo do Orfeón Voces Graves “Arousa” e a Coral Polifónica de Pontecesures.