A rúa Alameda, a derradeira obra que impulsou no concello levará o nome do ex alcalde que dedicou tres décadas ao servizo público e á veciñanza.
O Pleno da Corporación Municipal do Concello da Lama decidiu, sin ningún voto en contra, dedicarlle unha céntria rúa ao alcalde Jorge Canda Martínez, recentemente falecido e que dedicou máis de tres décadas da súa vida ao servizo público e á veciñanza.
A rúa escollida para levar o nome de Alcalde Jorge Canda será a Alameda onde o ex rexidor impulsou a derradeira das súas actuacións como alcalde e que foi inaugurada recentemente.
Durante a presentación da proposta, o actual alcalde David Carrera salientou a entrega e compromiso de Jorge Canda co seu pobo amosado ao longo de 28 anos como alcalde e máis de tres décadas como concelleiro formando parte da Corporación Municipal.
Carrera destacou a importancia que tivo para A Lama o traballo realizado por Jorge Canda e así salientou que durante o seu mandato se acometeron a maior parte das infraestruturas viarias do concello e a súa comunicación coa capital da provincia, a construción do campo de fútbol de herba artificial, o Centro Multiusos, as melloras sucesivas no centro escolar e de saúde, a creación do polígono industrial de Racelo, a modernización da Casa Consistorial e, dentro das últimas xestións realizadas antes de deixar a Alcaldía, a ampliación e mellora da estrada de Antas a Portela da Cruz, que agora se atopa na súa terceira e derradeira fase de execución.
Lembrou tamén que baixo o seu mandato impulsáronse a celebracións de festas gastronómicas como as do Codillo da Lama, a Semana Cultural, a colaboración con entidades veciñais e culturais para desenvolver todo tipo de actividades relacionadas coa Festas das Ermidas, O Pelete, a posta en marcha de servizos de abastecemento de augas municipais, centros socioculturais como os do Peso, etc.
MELLORA DA ORDENANZA DE EMPADROAMENTO E NATALIDADE
Por outra banda, a Corporación Municipal aprobou tamén a modificación da ordenanza para favorecer o empadroamento e a natalidade introducindo como melloras o feito de que os 1.000 de axuda se cobrarán dunha soa vez en lugar de en dúas anualidades como ata o de agora e que tamén se obrigará aos beneficiarios a estar 12 meses empadroados con anterioridade á petición da axuda e 4 anos máis despois de tela concedida, agás por motivos de forza maior. Tamén e a petición da concelleira socialistas Sandra Portela abriuse a posibilidade de solicitude da axuda nos tres primeiros meses despois de nacer o bebé en lugar de ter que agardar ao mes de setembro para facer o trámite.
Ademais deuse luz verde ao convenio que se asinará coa Deputación para investir uns 582.000 euros na humanización e mellora peonil das inmediacións da igrexa parroquial de San Salvador da Lama e o seu entronque coa Alameda, o Concello, o pavillón e o centro escolar co fin de favorecer unha mesma plataforma a convivencia harmónica entre a circulación do tráfico e os peóns.
