O proceso formativo impartirase todos os xoves de 18 a 20 horas e o alumnado poderá asistir de modo presencial ou en liña, en directo ou en diferido.
O Centro Asociado da UNED en Pontevedra mantén aberto o prazo de inscrición para participar no curso de “Alimentación e Actividade Física”, coordinado polo Departamento de Extensión Universitaria e Actividades Culturais, que dirixe Rafael Cotelo Pazos, e que se impartirá do 20 de outubro ao 24 de novembro. Esta iniciativa formativa estará dirixida por Bernardo Ordás López, biólogo investigador do CSIC e profesor-titor da UNED en Pontevedra, e intervirá como relatora David Torres Regueiro, licenciado en Ciencia e Tecnoloxía dos Alimentos e diplomado en Nutrición Humana e Dietética.
Este curso que a UNED imparte en Pontevedra poderá ser seguido de forma presencial, en liña, en directo ou en diferido, e está dirixido ao público en xeral ou a calquera persoa que queira adquirir coñecemento sobre alimentación aplicada ao exercicio e ao deporte.
O custo de matrícula para este curso de 12 horas lectivas e 0,5 crédito ECTS (en trámite) será de 24 euros e entre os seus obxectivos inclúense o coñecemento dos sistemas enerxéticos do organismo, o funcionamento do balance enerxético, coñecer os efectos da actividade física no organismo, o funcionamento do metabolismo de nutrientes, aplicar principios dietéticos segundo as rutinas físicas, promover a impotancia do exercicio físico en todas as etapas da vida e previr malos hábitos ou corrixir mitos asociados á alimentación no deporte.
Entre os temas para abordar durante as sesións do curso, que terán lugar os xoves de 18 a 20 horas están a enerxía e a actividade física, o metabolismo e sistemas básicos de enerxía, gasto e balance enerxético, consumo de osíxeno e actividade física, adaptación cardiorrespiratoria, a pirámide de alimentos e recomendacións nutricionais, antropometría, cálculo de dietas, modelos dietéticos segundo deportes, axudas ergogénicas, trastornos da conduta alimentaria, estudos poboacionais sobre alimentación e actividade física, etc.
Para poder recibir o certificado de aproveitamento deste curso, que impacta nos Obxectivos de Desenvolvemento Sostible, relacionados coa saúde e o benestar e a educación de calidade, é necesario asistir e/o visualizar o 85% das horas lectivas e realizar un breve traballo.
