Os técnicos do Plan de Control de Vertidos, dependente de Augas de Galicia, localizaron este foco nunha inspección rutineira nas redes fluviais do concello
A Xunta vén de eliminar un punto de vertido de augas residuais cara a un rego innominado, afluente do río Gafos, no concello de Vilaboa.
Os técnicos do Plan de Control de Vertidos, dependente de Augas de Galicia, localizaron este foco no marco das inspeccións rutineiras que veñen efectuando nas redes fluviais dos distintos termos municipais.
O vertido producíase a través dun colector de saneamento de titularidade municipal na parroquia de Figueirido, no lugar do Alcouce, que filtraba as augas residuais sen depurar.
Desde Augas de Galicia requiríuselle ao Concello a adopción das medidas correctoras oportunas para o cese dos vertidos, procedendo este á reparación do colector de saneamento que presentaba a incidencia.
Os técnicos autonómicos constataron nunha recente inspección o cese dos vertidos e da afección ao dominio público marítimo-terrestre.