• O documento servirá para garantir a compatibilidade do uso de espazos públicos para o establecemento de instalacións comerciais, turísticas ou hostaleiras coa circulación e o tránsito peonil e de vehículos, ao tempo que se garante o respecto pola contorna
• O concelleiro de Patrimonio e Facenda, Xulio Barreiro (BNG), informa de que o borrador será exposto na Sede Electrónica, no portal de Transparencia, para que a cidadanía poida consultalo e realizar achegas, antes de levar a Pleno a súa aprobación inicial
O Concello de Poio avanza na tramitación da nova ordenanza da ocupación de vía pública, que servirá para garantir a compatibilidade do uso en espazos públicos para o establecemento de instalacións turísticas, comerciais, hostaleiras ou de lecer, ao tempo que se garante o tránsito peonil e de vehículos, garantindo o respecto pola contorna. Este foi un dos temas abordados na Comisión de Facenda celebrada este mércores, na que, tal e como explica o concelleiro responsable de Facenda e Patrimonio, Xulio Barreiro (BNG), fíxoselles entrega a todos os grupos dun borrador inicial, co obxectivo de “aprobar un documento definitivo baseado no consenso e coa posibilidade de que toda a Corporación poida realizar as achegas que considere axeitadas para facer unha ordenanza o máis completa posible”.
Ademais, Barreiro tamén adiantou que o borrador poderá ser consultado pola cidadanía a través da Sede Electrónica do Concello. “Permanecerá exposto no apartado de Transparencia durante dez días hábiles, para que as persoas interesadas tamén poidan realizar as súas propostas”, indicou. Unha vez completado este paso, continuarase traballando no documento. O concelleiro de Facenda e Patrimonio confía en que a ordenanza poida ser ser aprobada inicialmente polo Pleno antes de que remate o ano.
“Nos últimos anos produciuse un incremento da demanda do uso de espazos públicos por parte de establecementos comerciais. Debemos dar resposta a esta demanda, garantindo que, ao mesmo tempo, non se produzan problemas de circulación, accesibilidade, tránsito e mesmo ruídos”, apunta Barreiro Lubián, que explica que o regulamento contemplará cuestións como a determinación dos espazos a ocupar, así como o período de tempo e horarios de tempo, ademais de definir os criterios da ocupación e o réxime de sancións que se aplicará no caso de incumprimento.
O concelleiro de Facenda e Patrimonio adianta, ademais, que nas vindeiras semanas organizaranse reunións en diferentes puntos do municipio, co obxectivo de dar a coñecer os detalles do borrador entre a veciñanza e o sector.
