Mantiveron contactos con representantes veciñais da Fraga, Laxoso e Portasouto para incorporalos a este movemento de oposición ás alternativas para o abastecemento de auga a Vigo e ao sur da provincia
A Plataforma en Defensa dos río Verdugo-Oitavén ENCORO NON levará a cabo este sábado 21 de maio, a partir das 10 da mañá, unha acción de concienciación cidadá a través da erradicación de especies invasoras nas beiras do río Oitavén, coordinada polo colectivo ecoloxista A Rente do Chan e coa colaboración da Comunidade de Montes de Gaxate.
Esta é unha das primeiras accións aprobadas pola Asemblea da Plataforma celebrada no Centro Sociocultural de Forzáns e vai orientada á defensa medioambiental do entorno natural do río Oitavén, definida polo alcalde de Vigo, Abel Caballero, como un “auténtico páramo”, para demostrar á opinión pública que o espazo que se pretende anegar por un encoro, sobre o que ten a última decisión a Consellería de Infraestruturas da Xunta, é un auténtico paraíso conformado por especies endémicas de ribeira e propias dun lugar prácticamente virxe que se ve agora amenazado por un estudio que prevé alternativas para o abastecemento de auga ao sur da provincia esquilmando os recursos naturais da parte alta do curso fluvial destes dous ríos.
Aquelas persoas interesadas en participar nesta actividade de concienciación medioambiental deberán presentarse provistas de luvas e ferramentas axeitadas (serras, serruchos, machadas, podadoras, etc.) ás 10 horas da mañá do sábado no Teleclub de Gaxate para, desde aí, recibir a información precisa por parte de membros do colectivo A Rente do Cha, conformar equipos e iniciar a actividade.
XUNTANZA CON VECIÑOS DA FRAGA, LAXOSO E PORTASOUTO
Por outra banda, membros da Plataforma manteñen un contacto directo con representantes veciñais da Fraga, Laxoso e Portasouto, lugares que resultarían como principais afectados no caso de que se decidira construír un encoro no río Verdugo, segundo aparece reflectido como unha das posibilidades baralladas polo estudo encargado pola Confederación Hidrográfica Miño-Sil.
As conversas van orientadas a incorporar a representantes destes lugares á Plataforma e ampliar o movemento social de oposición a calquera acción que teña como obxectivo a construción de encoros ou trasvasamentos de auga nos ríos Verdugo e Oitavén, en situación de especial vulnerabilidade, sobre todo en momentos de sequía.
A Plataforma segue suscitando apoios entre a veciñanza e son xa máis de 110 os colectivos que asinaron a día de hoxe o seu manifesto en contra das agresións medioambientais que prevé o estudo encargado pola Confederación Hidrográfica Miño-Sil como alternativas de abastecemento de auga aos municipios do sur da provincia de Pontevedra.
