― Estes traballos desenvólvense en distintos lugares das parroquias de Santa Cristina de Cobres e Santo Adrán de Cobres
― As tarefas céntranse na retirada de árbores e pólas caídas para evitar atoamentos na canle, e na eliminación de especies invasoras
― As accións enmárcase no programa de mantemento, conservación e mellora do dominio público hidráulico das bacías de Galicia-Costa, no ámbito Galicia-sur
A Consellería de Infraestruturas e Mobilidade, a través de Augas de Galicia, está a executar actuacións de conservación e limpeza nos treitos interurbanos dos ríos Maior e da Vella ao seu paso polo concello de Vilaboa.
Estes traballos desenvólvense en distintos lugares das parroquias de Santa Cristina de Cobres e Santo Adrán de Cobres.
As tarefas inclúen a retirada de árbores e pólas caídas na canle para evitar atoamentos e a eliminación de especies invasoras. Unha vez finalizadas estas actuacións, os ríos quedarán despexados de maleza, posibilitando así a circulación fluída das súas augas.
Augas de Galicia desenvolve estas accións no marco do programa de mantemento, conservación e mellora do dominio público hidráulico das bacías de Galicia-Costa, no ámbito territorial Galicia-sur e nas súas zonas de acceso e protección.
Estas intervencións do departamento que preside Ethel Vázquez contribuirán á mellora dos leitos fluviais para acadar condicións naturais dos ecosistemas que favorezan os aspectos medioambientais e de uso social na contorna dos ríos.
