Monitores do Club de Piragüismo de Vilaboa facilitarán a iniciación a este deporte cun paseo gratuíto en autovaciables desde a contorna da praia fluvial da Lama e a ponte do Verdugo
Preto de 180 persoas formalizaron nas oficinas do Concello da Lama a súa inscrición para participar nun paseo en piragua gratuíto polo río Verdugo que terá lugar este luns, 1 de agosto, a partir das 17 horas, e en seis quendas para maior comodidade e seguridade dos participantes.
Así, o Concello da Lama dedicará a xornada do próximo luns 1 de agosto, dentro do programa do “Verán Cultural”, a fomentar a práctica do piragüismo, coa posta en marcha dunha nova edición dos paseos en autovaciables desde a contorna da praia fluvial da Lama e a ponte vella do río Verdugo, para público de todas as idades. Esta iniciativa de grande éxito volve a poñerse en marcha despois de dous anos de parada obrigada por mor da pandemia da Covid-19.
Esta xornada de iniciación ao mundo do piragüismo conta coa colaboración material e humana do Club de Piragüismo Vilaboa que facilita monitores experimentados así como as embarcacións necesarias para atender quendas de paseo horarios desde as 17 ás 20 horas.
Os participantes terán que colocarse obrigatoriamente chalecos salvavidas que facilitará a organización e estarán en todo momento supervisados por monitores do Club de Piragüismo de Vilaboa que irán explicando aos asistentes as nocións básicas sobre a embarcación que van tomar para coñecer a súa manexo e posibilidades de practicar este deporte de maneira ocasional ou competitiva.
Os monitores expoñerán tamén aos participantes os distintos modelos de piragua existentes e as súas diferenzas coas canoas. Tamén as principais técnicas para facer máis eficiente o traballo da palada na auga.
PRAIA LIBRE DE FUMES E ACCESIBLE PARA PERSOAS CON DIFICULTADES DE MOVILIDADE
O Concello da Lama lembra que a praia fluvial do Verdugo conta cunhas analíticas que certifican que as súas augas teñen unha cualificación de “excelentes” e que está adherida á Rede Galega de Prias sen Fume. Ademais, conta con zona arborizada, espazos de sol e de sombra, mesas e todo tipo de servizos que fan deste lugar uno dos preferidos non só dos residentes e visitantes da Lama senón doutros municipios limítrofes.
O Concello da Lama, coa colaboración económica da Xunta de Galicia, realizou non hai moito un importante investimento en materia de mellora da accesibilidade á contorna natural da praia fluvial para persoas con dificultades de mobilidade e, en especial, para aquelas con problemas de visión severa que dispoñen de todo un sistema de guías para favorecer o seu normal desprazamento polos distintos lugares que compoñen estas instalacións.
