O plan de modernización da rede e a reparación de fugas permite ao Concello aforrar este ano máis de 50.000 metros cúbicos de auga ao mes, sendo un dos poucos municipios da provincia que consegue reducir o seu consumo este ano.
– O Concello de Redondela traballa desde hai meses cun plan de axuste para reducir o consumo de auga nos servizos públicos. “O rego en parques e xardíns recortouse un 70%, os baldeos realízanse só un día por semana e unicamente en zonas puntuais e as duchas das praias permanecen pechadas”, sinala a alcaldesa Digna Rivas.
– A concellería de Infraestruturas e Sostibilidade traballa desde 2023 nun plan de modernización da rede de abastecemento e reparación de fugas que permite aforrar este ano máis de 50.000 metros cúbicos ao mes, “o que sería o equivalente ao consumo de auga de 3.000 fogares”, explica o concelleiro Roberto Villar.
A falta de choiva e a baixada do nivel dos encoros levou a Augas de Galicia a decretar a “prealerta por seca moderada”, notificación que chegou onte de xeito oficial ao Concello de Redondela. Con todo, desde o goberno local hai xa meses que se traballa cun plan de axuste para reducir o consumo de auga nos servizos públicos. A alcaldesa, Digna Rivas, afirma que “os sistemas de rego en parques e xardíns recortáronse un 70%, os baldeos das rúas limitáronse a un día por semana e só en zonas puntuais, e as duchas das praias permanecen pechadas”. En canto ás fontes ornamentais do municipio que están en funcionamento, son elementos que funcionan cun circuíto pechado de auga que non xera consumo.
Desde o Concello fan un chamamento á cidadanía para que faga un consumo “racional e responsable da auga”. O uso debe limitarse ao consumo doméstico, evitando regos de hortas e xardíns, enchido de piscinas ou lavado de coches.
Plan de mellora na rede de abastecemento
O departamento de Infraestruturas e Sostibilidade que dirixe Roberto Villar traballa desde 2023 nun plan de “boas prácticas” para a modernización da rede de abastecemento de auga e a reparacións de fugas. Estes traballos permitiron aforrar unha media de 50.000 metros cúbicos de auga o mes, “reducimos o gasto de auga ao equivalente de consumo de 3.000 fogares”, explica Villar. “Somos un dos poucos Concellos da provincia de Pontevedra que conseguiu reducir o consumo de auga nos últimos anos”, afirma o edil. Os datos corresponden ao depósito situado en Quintela e que subministra auga para todas as parroquias do municipio, agás Chapela. O obxectivo deste departamento é seguir nesta mesma senda “cun traballo a medio e longo prazo que hai que ir despregando en todas as parroquias”. Trátase de favorecer un uso responsable da auga e optimizar este recurso natural “que é un ben escaso e esencial”. Villar incidiu tamén en que un 30% da poboación do Concello de Redondela non depende destes recursos da rede municipal, xa que se abastecen das comunidades de augas privadas que existen nas diferentes parroquias. Polo de agora ningunha destas comunidades de augas presenta problemas de abastecemento.
