A nova agrupación de Protección Civil Oitavén -Tea, con base en Soutomaior e en Mondariz, é a agrupación máis grande de toda Galicia.
Esta mañá, o Castelo de Soutomaior, foi o escenario para a sinatura do convenio da agrupación de Protección Civil Oitavén – Tea. Unha agrupación conformada por seis concellos de todas as cores políticas. Unha agrupación, que nace froito dun gran acordo entre alcaldes, e conten cun importante incremento de recursos e persoal, o que a súa vez suporá a mellora da prestación de servizos.
Unha sinatura na que esta mañá estiveron presentes Manu Lourenzo, alcalde de Soutomaior; Xoán Carlos Montes, alcalde de Mondariz; César Gil, alcalde de Mondariz Balneario; David Carrera, alcalde da Lama; Juan Pablo Castillo, alcalde de Covelo; Emiliano Lage, alcalde de Fornelos de Montes; Mónica Oliveira, presidenta da. Agrupación de Protección Civil Oitavén-Tea; Cesáreo Portas, presidente da Agrupación de Protección Civil de Cangas; Juan Benito Insua, xefe da área técnica de Emerxencias da Xunta de Galicia e Joaquín Queizán xefe de sala do CECOP.
Con este convenio os 6 concellos contan con novo equipamento e maximizan o rendemento de Protección Civil prestando un mellor servizo a un menor custe. Así mesmo, a nova agrupación ten opción a mellores subvencións, o que a súa vez repercutirá na obtención de máis e mellor material para executar as súas funcións. Ademais, de acordo co negociado coa Dirección Xeral de Emerxencias, esta nova agrupación conta con profesionais con ampla formación no sector das emerxencias contratado a tempo completo.
Con esta cohesión os seis concellos que conforman esta agrupación pasarán a ter un operativo de Protección Civil con máis de 30 voluntarios, unha cifra que se incrementará nos vindeiros meses coa incorporación de novos voluntarios que na actualidade están realizando cursos formativos.
Deste xeito, Protección Civil Oitavén – Tea contará con 4 vehículos: 2 todoterrenos, 1 furgoneta, 1 turismo, 2 remolques de emerxencia, 2 carpas, 1 moto e equipamento para operativos especias e atención sanitaria.
O alcalde de Soutomaior, Manu Lourenzo, quixo nesta xornada “ agradecer a boa disposición de todos os alcaldes dos diferentes partidos políticos que conforman estes concellos: PSOE, PP, BNG e Independente, partidos, todos eles, que traballaron por un gran acordo que vai a mellorar a calidade de vida da nosa veciñanza de todos os municipios, no caso de Soutomaior teremos, ademais, un importante mellora de recursos a aforraremos máis de 12 mil euros en relación ao que se viña gastando en anos ateriores”. Ao que Lourenzo engadíu que esta agrupación “´é unha exemplo de unión de esforzos e de antepoñer os intereses da veciñanza por enriba das lexítimas diferenzas políticas que permitirá que calquera veciña ou veciño destes concellos poda chamar ao 112 para recibir a atención de Protección Civil”.
