O concello de Soutomaior vén de conseguir unha nova subvención de máis de 29 mil euros, da Axencia Turismo de Galicia, un investimento que estará destinado a incrementar e mellor os recursos turísticos do concello.
O proxecto aprobado consiste nunha actuación de sinalización e creación de contidos interpretativos nas marxes do sendeiro que percorre a ribeira do río Verdugo, na súa desembocadura, e a enseada de San Simón, dentro dos límites municipais do Concello de Soutomaior, na parroquia de Santiago de Arcade.
En concreto, o tramo sobre o que se propón actuar (1.270 metros), é aquel que transcorre entre o peirao de Arcade e a ponte histórica de Ponte Sampaio sobre a que pasa o Camiño Portugués a Santiago e que marca o límite co veciño municipio de Pontevedra.
Este proxecto implica, por unha banda a instalación de seis sinais de carácter interpretativo nas beiras dun sendeiro de terra xa existente e por outra, a creación de contidos interpretativos (texto e imaxes) para incorporar tanto ao corpo dos sinais como para ampliar información na web do concello de Soutomaior.
Segundo dixo nesta xornada a concelleira de Turismo, Silvia Cernadas, “este é un exemplo máis da boa xestión que estamos facendo dende o Goberno de Soutomaior captando subvencións que nos permiten, neste caso, actualizar e preparar unha zona especialmente turística, como é neste caso o paseo marítimo de Arcade, que forma parte da Rede Natura, porque tanto a veciñanza como quen nos visita poida desfrutar desta contorna nas mellores condicións”.
Os principais obxectivos deste proxecto son: mellorar a calidade da experiencia dos/as visitantes da senda sinalizando os principais recursos turísticos da zona por onde transcorre a senda; mellorar a experiencia e alternativas de visita dos/as turistas que visitan a localidade de Arcade; habilitar unha nova alternativa de ocio aos peregrinos que se achegan polo Camiño Portugués a Compostela mediante a desestacionalización da oferta turística; dotar á localidade de Arcade dunha infraestrutura de calidade orientada tanto ás actividades de ocio, como ao exercicio físico e ao coñecemento da contorna natural e cultural; unificar, modernizar e adaptar á normativa vixente a sinalética dos recursos turísticos da ribeira do río Verdugo; promover o coñecemento e respecto polo patrimonio histórico e cultural de Arcade.; destacar a importancia medioambiental da Enseada de San Simón e da desembocadura do río Verdugo; concienciar á veciñanza e aos visitantes no respecto e na necesidade de conservación do patrimonio natural e cultural.
Un proxecto do que se poderá desfrutar e que se converterá nunha realidade a finais deste 2025.
