Soutomaior aprobará este xoves os orzamentos municipais co maior gasto social da súa historia

As axudas para familias en risco duplícanse respecto ao ano anterioDestinaranse máis de 20.000 euros para apoiar á hostalería local
O Concello de Soutomaior aprobará este xoves os seus orzamentos para o ano 2021. Unha previsión económica que ascende a 4.479.052 euros, sen contar as achegas doutros organismos, e que ten como principal obxectivo conter os efectos da pandemia no municipio mediante axudas directas a familias e negocios locais. Todo iso mantendo por noveno ano consecutivo a Débeda 0 do consistorio e a conxelación de taxas municipais.
O alcalde de Soutomaior, o popular Agustín Reguera, definiu estes novos orzamentos como “realistas, baseados na eficiencia na xestión e co obxectivo claro de protexer aos veciños e ás empresas locais. Aseguramos o mantemento de todos os servizos, incrementando as partidas máis importantes, mantendo a Débeda 0 e pensando nos veciños coa conxelación de taxas municipais por noveno ano consecutivo”.
A principal novidade da previsión deste ano é o aumento da partida destinada os Servizos Sociais e as políticas de protección e promoción Social no municipio, que alcanza os 606.000 euros. Esta subida está motivada polo aumento na partida destinada a sufragar as axudas a familias en risco de exclusión social, que pasa dos 22.000 euros a case o dobre, 42.000 euros.
Ademais, cumprindo co acordo alcanzado entre o alcalde e a Asociación de Hostaleiros, se reserva unha partida de máis de 20.000 euros para financiar as axudas directas aos negocios locais. Subvención destinada a cubrir os gastos de auga, rede de sumidoiros e recollida de lixo, ademais de manter a exención no pago polas terrazas.
As partidas destinadas a Deporte, Xuventude, Igualdade e Turismo mantéñense con respecto ao exercicio pasado. A única concellería que rexistra unha leve baixada é a de Cultura, que, #ante a imposibilidade de organizar festas e eventos, posibilita o aforro necesario para sufragar a subida en acción social.
Ademais, o novo orzamento contempla unha subida salarial do 0.9% para os empregados municipais reflectido na partida de persoal. Unha mellora na que non se inclúen as retribucións do equipo de goberno, que serán as mesmas que o pasado ano.
Do mesmo xeito, “hai partidas que podemos baixar debido á boa xestión e ás melloras realizadas durante estes anos”, confirmou Reguera, referíndose á previsión do gasto eléctrico municipal, “Grazas á iluminación LED que instalamos en Barroncas e Cima de Vila, está previsto que podamos aforrar máis de 8.000 euros anuais en electricidade. É un aforro moi importante e con cada mellora que fagamos, máis aforraremos”, concluíu Reguera.
A pesar de non estar contabilizados neste orzamento, haberá que sumar 526.000 euros máis procedentes das achegas doutros organismos. Deles, 400.000 euros destinaranse a investimentos e melloras no municipio e 126.000 a promoción do emprego e contratacións. Neste sentido, xa están programadas varias actuacións que se financiarán con estas achegas como a mellora no acceso á Igrexa de Soutomaior, a conversión a Centro Social da antiga Escola Unitaria de Moreira, a humanización da Rúa Cabadiña, a ampliación das beirarrúas desde o Peirao ata a escola infantil e as melloras no exterior da Escola de Alxán e a Escola da Banda de Música.
Investimentos co remanente acumulado
Do mesmo xeito, segundo indicou o alcalde, tamén están previstas varias melloras que se financiarán a cargo do remanente municipal acumulado. A principal é a humanización do Camiño de Santiago ao seu paso por Arcade, pero tamén se inclúen varios asfaltados no rural, investimentos en eficiencia enerxética, unha actuación en Arcade de Riba e a mellora de varios parques infantís, “especialmente o de Tallo Rio, que o renovaremos case por completo”, explicou Reguera.
Por último, neste apartado de actuacións financiadas co remanente do orzamento municipal, tamén se inclúe a reserva de fondos para a adquisición dos terreos para a construción do novo centro de saúde na zona de Salgueirón, que terá unha superficie útil superior aos 1200 metros cadrados.