Soutomaior destinou máis de 34.000 euros para axudas derivadas do Covid durante o primeiro ano de pandemia

A principal partida destinouse a cubrir situacións de emerxencia social e á compra de alimentos
A escasas semanas de cumprirse o primeiro aniversario da pandemia orixinada polo Covid19, os Servizos Sociais do Concello de Soutomaior acaban de facer balance das súas actuacións durante a alerta sanitaria. En total, entre as diversas axudas creadas para amortecer os efectos desta crise, o goberno local destinou 34.299,89 euros aos que haberá que sumar os 20.000 prometidos polo alcalde en axudas directas para a hostalería.
A axuda de máis contía, cun total de 17.201,79 euros, foi a destinada a cubrir as situacións de emerxencia entre as familias máis vulnerables do municipio. Unha axuda destinada a sufragar o gasto das subministracións habituais nos seus fogares como o recibo da luz, a auga, gas, alugueiro…
Tamén destaca o importe destinado á compra de alimentos, tanto para a súa entrega directa a través dos Servizos Sociais municipais como a través de vales trocables polos propios usuarios nos supermercados, que ascende ata os 9.515,08 euros.
Do mesmo xeito, o Concello de Soutomaior destinou un total de 4.012,07 euros en axudas directas a veciños que perderon os seus empregos pola crise sanitaria e 2.270,95 euros a dotacións do fogar para familias vulnerables como lavadoras, frigoríficos e pequenos electrodomésticos. Para finalizar está a axuda de 1.300,00 euros destinados a sufragar material escolar a familias en risco con menores ao seu cargo.
O alcalde de Soutomaior, Agustín Reguera, destacou o esforzo que desde o Concello está a facerse para afrontar a crise derivada da Covid19, “sobre todo protexendo ás familias, pero tamén axudando a sectores fundamentais para o noso municipio como a hostalería e o comercio local, aos que axudamos suprimindo as taxas durante o tempo que estean obrigados a pechar ou facilitando a súa presenza dixital e o seu acceso ao comercio electrónico”, finalizou o rexedor.