SOUTOMAIOR INICIA A CONSTRUCIÓN DO seu PRIMEIRO XARDÍN DA DIVERSIDADE
- Os traballos teñen un orzamento de contratación de 17.000 euros que se afrontarán exclusivamente con fondos municipais
- O Concello de Soutomaior acaba de iniciar os traballos de creación do primeiro xardín da diversidade do municipio. Un novo espazo de lecer e esparexemento deseñado para dar visibilidade e normalizar ás diferentes sensibilidades e formas de sentir.
- O alcalde de Soutomaior, Agustín Reguera, e a edil de Servizos Sociais, Cristina González, visitaron esta mañá os traballos de instalación dos diferentes elementos do parque. “Esta clase de iniciativas fan do noso municipio un lugar máis amable, acolledor e respectuoso con todas as sensibilidades”, explicou González, que indicou que os traballos estarán finalizados a próxima semana.
- O xardín estará situado xunto ao parque canino de Arcade e contará con diferentes elementos e un mobiliario público específico coa madeira tradicional como elemento base. Así, instalaranse tres elementos de xogo, varios tallos, un carreiro de pedra natural e paneis artísticos e informativos.
- O xardín da diversidade é unha iniciativa promovida pola Concellería de Igualdade do Concello de Soutomaior e a súa instalación conta cun orzamento final de 17.000 euros que se financiarán exclusivamente con fondos propios municipais.