Este é o resultado da boa xestión económica que se está levando a cabo dende o Goberno Local. Un goberno que tal e como dixo nesta xornada o alcalde “está traballando arreo dende o minuto un e isto nos permite que na metade do mandato poidamos ter sete importantes procesos de licitación abertos”.
Esta mañá o alcalde de Soutomaior, Manu Lourenzo, informou sobre as licitacións que están postas en marcha nestes intres no concello de Soutomaior que son un total de sete e de vital importancia para o concello.
Estas licitacións suman un valor de 6,3 millóns de euros xa que entre elas está o servizo de xestión de residuos municipais do concello, a humanización do camiño de Santiago ao seu paso pola rúa Coutada e Fonte do Conde, a mellora da seguridade vial e pavimentación do camiño o Val-Lourido, o subministro e servizo de mantemento do alumeado e instalación eléctricas do concello, a pavimentación en camiño de Moreira, Barreiriña e Sameán, o subministro e servizos de sinalización e interpretación dos recursos turísticos e a mellora do peche e sistema de rego no Campo de fútbol Graciano Padín.
O alcalde, Manu Lourenzo, destacou hoxe a “xestión económica e a situación económica do concello, somos un goberno que dende o minuto un foi consciente de que non se podía aforrar esforzos para a transformación do noso concello, grazas ao traballo inxente de persoal técnico, funcionario e goberno destes dous primeiros anos de goberno temos estes proxectos en marcha por valor de máis de 6,3 millóns de euros. Hoxe por hoxe en Soutomaior queremos ser un concello novo e de referencia quero agradecer o traballo de todas as persoas que fan isto posible.
Ademais o alcalde tamén lembrou que nos vindeiros días sairán xa a licitación proxectos importantes como a reurbanicación de Talo Río, o entorno do concello, o salón de plenos do concello, a adquisición dos puntos limpos e os pregos para a plan do eco parque empresarial de Soutomaior.
