O pasado mércores a borrasca Kirk pasou por toda Galiza. No noso concello prevíanse ventos de entre 100 e 120 km/h, estaba en alerta laranxa polos fortes ventos e aínda así non houbo ningún tipo de actuación preventiva por parte do goberno local. “Isto é un desgoberno total. Non existe xestión a ningún nivel” remarcan desde a fronte nacionalista.
O PPdeG anunciou con triunfalismo que a normalidade volvera á Estrada o día xoves, tan só 24 horas despois da borrasca. Porén, a situación é ben distinta. Segue a haber marquesiñas esnaquizadas, pólas caídas ou uralitas espalladas en múltiples lugares do concello. Na propia alameda hai árbores arrincadas, que se suman ás que xa estaban mortas na mesma localización.
“Mención á parte require a carballeira da Estrada” di Reices. A pesar das reiteradas peticións do BNG para o correcto mantemento deste espazo está en estado de abandono. Días despois da borrasca Kirk todos os ramallos seguen no chan e, peor aínda, hai pólas esgazadas en altura que ameazan con caer e son un risco para calquera que pase por aí. Desde o Bloque instan ao goberno a actuar de xeito inmediato na carballeira para manter a seguridade e retirar os restos do temporal.
Ademais os nacionalistas propoñen que as pólas recollidas se fendan para leña e se sorteen entre a veciñanza, un sorteo ao que tamén se podería anotar o alcalde. “A ver se co incentivo de poder conseguir leña gratis Gonzalo fai o seu traballo” ironizan os nacionalistas.