• Luciano Otero lidera unha mediación que permite unha tregua de 3 meses para avanzar na execución do proxecto de mellora desta estrada clave para a comunicación de Pazos de Borbén.
O Concello de Pazos de Borbén informa de que na tarde de onte o alcalde, Luciano Otero, mantivo unha reunión coa Plataforma pola estrada EP-2702 e coa veciñanza afectada, co obxectivo de mediar entre a Deputación de Pontevedra e a propia Plataforma. Esta mediación busca avanzar na execución do proxecto de mellora desta vía, esencial para a comunicación entre Amoedo e Os Valos e cuxo primeiro tramo xa está asinado e comprometido pola Deputación.
A EP-2702 é unha estrada clave para Pazos de Borbén e outros concellos do interior da comarca, ao ser unha das dúas saídas principais cara a N-550. Nas últimas semanas, a Plataforma pola Mellora da EP-2702 incrementou as súas mobilizacións para esixir que se liciten xa as obras da primeira fase que abarca o tramo desde o cruce de Os Valos ata o cruce da igrexa de Nespereira. E, sobre todo, para demandar un compromiso claro da Deputación para acometer a mellora da totalidade dos 8 quilómetros que conforman a vía sen perder máis tempo.
Ante esta situación, o alcalde Luciano Otero deu un paso ao fronte e, tras manter un encontro cos veciños e veciñas, conseguiu alcanzar un acordo. Na reunión celebrada onte decidiuse establecer unha tregua de 3 meses nas mobilizacións, ofrecendo á Deputación de Pontevedra un voto de confianza para que cumpra co compromiso de iniciar as obras do primeiro tramo. Agárdase, tamén, que a Deputación valore este xesto e inicie un diálogo coa Plataforma e Concello para poñerlle data ás actuacións necesarias para os seguintes tramos.
Unha estrada clave e unha reivindicación histórica
A EP-2702 soporta un alto volume de tráfico, especialmente de transporte pesado, debido á prohibición de paso de camións polo núcleo de Redondela. Esta situación incrementou a perigosidade da vía, que presenta numerosas curvas, ausencia de espazos para peóns e un ancho insuficiente para o tráfico actual. Esta realidade, sumada ao tránsito diario de autobuses escolares, motivou as mobilizacións da veciñanza nos últimos meses.
O alcalde de Pazos de Borbén, Luciano Otero, salientou a importancia deste acordo: “Dende o Concello sempre apostamos polo diálogo e a colaboración. Esta tregua é un xesto cara a Deputación, agardamos que o Presidente teña altura de miras e saiba aproveitalo. Pedimos o que é de sentido común, que a Deputación cumpra co seu deber e as obras se inicien canto antes. Durante estes tres meses seguiremos atentos, traballando para que as actuacións se executen no menor tempo posible e para que a mellora da estrada sexa integral e non se limite só ao primeiro tramo.”
O Concello de Pazos de Borbén comprométese a seguir mediando entre a Deputación e a veciñanza, garantindo que as demandas da cidadanía se escoiten e se respecten. O acordo de tregua non impide a realización de novas reunións coas persoas afectadas, que seguirán organizándose para supervisar o cumprimento dos compromisos adquiridos.
Compromiso para o futuro
Dende o Concello de Pazos de Borbén, o alcalde Luciano Otero reitera a súa disposición a continuar traballando a prol da veciñanza e destaca a importancia de manter o diálogo aberto e construtivo. Este acordo representa un paso importante, pero o Concello será firme na esixencia de que as actuacións se executen de forma completa e dentro dos prazos establecidos.
