O Club Baloncesto Tui busca nesta Final Four ser un dos tres equipos que representará a Galicia no Campionato de España de Clubes.
O Vello Pavillón de Tui acolle esta fin de semana a Final Four de Baloncesto na que o equipo infantil masculino do Club Baloncesto Tui disputará mañá sábado, a clasificación para o Campionato de España que se celebrará en Betanzos.
A competición foi presentada esta mañá na casa do concello polo alcalde de Tui, Enrique Cabaleiro, o concelleiro de deportes, Rafael Estévez, o responsable da área de Vigo da Federación Galega de Baloncesto, José Luís Pérez, e o presidente e director deportivo do CB Tui, Nicolás Lorenzo e Javier Niño.
O alcalde de Tui, Enrique Cabaleiro, indicaba que “o baloncesto é para Tui unha sinal de identidade e a celebración desta Final Four será un momento importante e feliz para esta cidade”. Por outra parte, o rexedor felicitaba a Nicolás Lorenzo por asumir de novo a presidencia do Club Baloncesto Tui e reiteraba o seu agradecemento a Federación Galega de Baloncesto por elexir Tui para a disputa deste evento. Salientaba tamén o compromiso do Concello de Tui co Baloncesto lembrando a recente remodelación do Novo Pavillón e salientaba que nos vindeiros meses o Vello Pavillón remodelarase por completo.
O concelleiro de Deportes de Tui, Rafael Estévez, felicitou ao equipo infantil por esta clasificación para disputar a Final Four ao Campionato de España e reafirmábase “no compromiso do concello co deporte, aumentando a partida destinada, nos orzamentos aprobados onte, a subvención para clubes de 97.500 a 119.000 euros”.
O presidente do Club Baloncesto Tui, Nicolás Lorenzo, recoñecía a “intensa labor do concello no mantemento das instalacións deportivas” e explicaba que o CB Tui nesta final a catro e sendo o campión da liga regular, é o principal favorito. Lembraba tamén que “o CB Tui en deporte base é un dos equipos principais a nivel galego, enfrontándose e competindo ao mesmo nivel con equipos máis grandes e con maior presuposto e recursos”.
Por último, o responsable da área de Vigo da Federación Galega de Baloncesto, destacaba a sintonía da federación coa nova directiva do CB Tui e recoñecía “a importante historia desta cidade como sede de campionatos de Baloncesto”. Felicitaba tamén o equipo tudense polos seus éxitos xa que tamén o equipo de segunda división xoga esta fin de semana en Ourense outra Final Four na que busca o ascenso a primeira división e o título de Campión Autonómico.
O sábado ás 12:30 h no Vello Pavillón de Tui o Club Baloncesto Tui, como primeiro clasificado, busca unha das tres plazas en xogo fronte ao Aringal Basket Ferrol. Antes, ás 10:30 h, xogarase a outra semifinal entre o Papelya! Seis do Nadal e o Instituto Rosalía. A final celebrarase ás 19:30 h entre os gañadores das semifinais e, previamente ás 17:30, o partido polo terceiro e cuarto posto. O encontro final retransmitirase a través de Fegaba Tv, a canle de Youtube da Federación Galega de Baloncesto.
Cumprindo as medidas de prevención sanitaria da Xunta de Galicia, o aforo do pavillón estará reducido ao 30% da súa capacidade. Pódese reservar unha praza para asistir aos encontros por Whatsapp nos teléfonos 634 61 60 76 ou 696 48 22 49.
