• Dende o Concello do Porriño fan un chamamento para que todo aquel que queira botar unha man, participe como voluntario/a nos labores de restauración ambiental deste río que se desenvolverán este sábado
A asociación ecoloxista Verdegaia, en colaboración co Concello do Porriño, está a desenvolver intervencións de limpeza e eliminación de especies invasoras no río Couso. Un grupo de voluntarios e voluntarias, dirixidos por membros da asociación que contan cunha ampla experiencia en actividades de restauración ambiental, levaron a cabo xa dúas intervencións no río e, por mor do mal tempo, tiveron que suspender a última delas.
Finalmente celebrarase este sábado, 2 de decembro de 11 a 13h. Aquelas persoas interesadas en formar parte do equipo de voluntariado para esta intervención, poderán informarse e/ou inscribirse no teléfono 986337624 (ext 1) ou no correo electrónico omix@oporrino.org , ata o día 1 de decembro ás 10 h.
Nesta última xornada farase unha revisión do traballo realizado nas anteriores e analizarase a posibilidade de repoboación da zona con especies autóctonas para frear a expansión das EEI que rodean a contorna intervida.
