Tamén acudiron comuneiros de Ponte Caldelas e Carballedo a este evento no que se abordou a normativa e o Plan Municipal de Prevención e Defensa contra Incendios Forestais.
Veciños e representantes de comunidades de montes da Lama asistiron á xornada sobre a “Xestión da vexetación nos núcleos poboacionais e outras infraestruturas” organizado polo Concello para informar á veciñanza da normativa e do Plan Municipal de Prevención e Defensa contra Incendios Forestais.
A xornada, que se desenrolou no Centro Multiusos da Lama contou coa presenza dos tenentes de alcalde David Carrera e Jorge Méndez (responsable de Medio Rural) e o concelleiro de Cultura e Deportes, Daniel Vidal. O acto correu a cargo dun Axente Ambiental do Distrito Forestal XIX, dependente da Consellería de Medio Rural da Xunta, e a el asistiron tamén comuneiros de Ponte Caldelas e Carballedo (Cerdedo-Cotobade).
Esta xornada promovida e organizada polo Concello da Lama estaba especialmente orientada a propietarios de fincas rústicas, comunidades de montes, titulares de explotacións agrícolas e gandeiras, habitantes de núcleos rurais e residentes en núcleos urbanos que limiten con fincas rústicas, así como calquera interesado nestas cuestións.
UN PEQUENO INCENDIO EN XESTA RETRASOU A XORNADA
Curiosamente, a chegada do Axente Forestal ás xornadas retrasouse media hora porque estaba participando, precisamente, nun operativo de extinción dun pequeno conato de incendio forestal que se producira momentos antes na parroquia de Xesta, no entorno dunha plantación recén realizada e que serviu de introdución para comezar esta conferencia.
O obxectivo desta xornada formativa e divulgativa foi achegar a normativa sobre a xestión da biomasa recollidas na Lei de Montes así como na Lei de Incendios para levar a cabo labores de prevención e, ao mesmo tempo, evitar que se cometan infraccións neste sentido que poidan acarrear a incoación posterior de expedientes sancionadores.
No transcurso da xornada, tamén se expuso e se deu a coñecer entre os presentes o Plan Municipal de Prevención e Defensa contra Incendios Forestais que marca toda a estratexia de prevención do Concello da Lama e onde a veciñanza ten que tomar conciencia da importancia de erradicar especies pirófitas a menos de 50 metros das casas, a limpeza nunha franxa de entre 4 e 6 metros dos viais e da necesidade de abordar as rozas dentro do periodo voluntario establecido ata finais do presente mes de maio para evitar que se teñan que incoar expedientes sancionadores.
Tamén se informou que para facer calquera corta, aínda que sexa dunha árbore, débese tramitar un sinxelo permiso de autorización ante a Xunta, que é a entidade competente neste tema e non o Concello. O Axente Forestal insistiu en que os refugallos das cortas hai que retiralos ou eliminalos antes dun mes de ter realizado estes traballos e que están taxativamente prohibidas as queimas en zona forestal.
