Urxe iniciar os trámites para a declaración de zona tensionada, aprobada polo Pleno hai 16 meses por iniciativa nacionalista, despois da aprobación oficial na Coruña e os avances en Santiago de Compostela
Tacha de “tomadura de pelo” a resposta da concelleira de Urbanismo anunciando un observatorio para analizar a evolución do mercado de vivenda
Xabier P. Igrexas: “Cantas evidencias máis necesita o Goberno de Caballero para actuar xa fronte o brutal aumento dos prezos do alugueiro?”
O Bloque Nacionalista Galego (BNG) acusa o Goberno municipal de Abel Caballero de “non mover un só papel nin ter intención de facelo” para que Vigo sexa zona tensionada do mercado da vivenda. A fronte nacionalista urxe iniciar os trámites para esta declaración —unha medida aprobada polo Pleno hai 16 meses por iniciativa do Bloque— despois da súa aprobación oficial na Coruña e os avances en Santiago de Compostela.
O portavoz municipal do BNG, Xabier P. Igrexas, interpelou este martes na Xerencia de Urbanismo á concelleira María Xosé Caride sobre cando ten previsto o Concello poñer en marcha a tramitación. A edil de Urbanismo limitouse a afirmar que están despregando un paquete de medidas, sen concretar cales, e que van constituír un observatorio para analizar a evolución do mercado de vivenda.
“Que hai que observar? Cantas evidencias máis necesita o Goberno de Caballero para actuar xa fronte o brutal aumento dos prezos do alugueiro, que foi de máis de 31% nos últimos 5 anos?”, cuestionou Igrexas, tachando de “tomadura de pelo” a resposta. Aliás, o portavoz nacionalista preguntouse para que encargou o Concello un estudo que xa confirmou que Vigo reúne os requisitos para ter a declaración de zona tensionada.
Reducións entre 50 e 100 euros
Dende o BNG reiteraron a urxencia de poñer en marcha esta medida que, malia considerala “insuficiente para atallar o gravísimo problema de acceso social á vivenda”, permitiría reducir entre 50 e 100 euros o custo mensual dos alugueiros, que superan xa os 675 euros mensuais de media na cidade. Igrexas reclamou cumprir así con este acordo do Pleno municipal, recollido nunha moción nacionalista aprobada en marzo de 2024.
“Son necesarias medidas e decisións xa, non pode agardar un minuto máis”, demandou o portavoz municipal do Bloque, chamando o alcalde a “deixarse de anuncios e promesas e poñer en marcha medidas concretas para garantir o primeiro dereito das viguesas e vigueses que é o de poder vivir na súa cidade”.
A fronte nacionalista seguir o camiño iniciado na Coruña, que vén de lograr este martes a declaración oficial de zona tensionada do mercado da vivenda, e de Santiago de Compostela, que avanza na súa tramitación por impulso da alcaldía do BNG malia os “atrancos” da Xunta de Galiza gobernada polo PP.
