A iniciativa desenvolvida pola Concellería de Medio Ambiente busca informar sobre a importancia deste sistema máis económico e ecolóxico que os tratamentos tradicionais de lixo
A Concellería de Medio Ambiente do Concello de Redondela que xestiona Alberto Álvarez, vén de anunciar o inicio dunha campaña de sensibilización sobre a compostaxe de cara a concienciar á cidadanía da problemática dos residuos sólidos urbanos e da importancia que ten a compostaxe, non só para obter abono orgánico de alta calidade, senón como alternativa necesaria aos tratamentos actuais ao ser máis económico e ecolóxico.
“É preciso acadar un cambio de actitude e tamén de responsabilidade na separación dos residuos orgánicos domésticos e, nese obxectivo, a utilización dos composteiros individuais e comunitarios é un compromiso persoal de cada veciña e veciño en mellorar o noso medioambiente”, asegura Alberto Álvarez.
Xornadas de información e preinscricións
Como primeira medida, o Concello desenvolverá unha campaña informativa na que, nunha carpa situada en lugares estratéxicos pola súa afluencia de público, darase a coñecer ás veciñas e veciños interesados, as vantaxes da compostaxe, os residuos que se poden utilizar, o xeito de obter compost e os beneficios do mesmo como abono orgánico.
As persoas interesadas en recibir un composteiro doméstico deberán encher un formulario para, en días posteriores, proceder a súa entrega.
A carpa informativa, nesta vindeira semana, quedará situada nos seguintes emprazamentos en horario de 9:30 h a 14 h:
Luns 27 de setembro. Centro de Saúde de Chapela.
Martes 28 de setembro. Alameda Rosalía de Castro de Chapela.
Xoves 30 de setembro. Mercado de Abastos de Redondela.
Charlas informativas e adxudicación de composteiros
Amais das xornadas de información, o Concello desenvolverá charlas informativas nas distintas parroquias –todas elas ás 20 horas– segundo seguinte calendario:
Mércores 29 de setembro. Centro Cultural de Cabeiro
Xoves 30 de setembro. Centro Cultural Miñoteira. San Martiño
Venres 1 de outubro. Centro Cultural Saramagoso. O Viso.
As charlas informativas, logo das que se desenvolvan nesta primeira semana, percorrerán todas e cada unha das parroquias de Redondela en horarios e lugares que se darán a coñecer oportunamente.
A alcaldesa Digna Rivas salientou a importancia desta campaña de fomento da compostaxe desenvolvida dende a Concellería de Medio Ambiente “ao constituír unha ferramenta de extraordinaria importancia na xestión dos residuos orgánicos”.
Rivas lembrou que está comprobado que a compostaxe “reduce a cantidade de materia orgánica e, polo tanto, reduce os custes de transporte dos residuos cos conseguintes beneficios para a cidadanía”. Ao mesmo tempo, apuntou a rexedora local “a retención de auga do compost, aforra auga de rego e aporta os nutrientes para o desenvolvemento das plantas de forma natural”.
Con esta campaña, remata a alcaldesa, “o Goberno local reafírmase na súa aposta polo medio ambiente e por todas aquelas iniciativas que poidan propiciar a mellora do noso entorno natural”.
