Con este conxunto de medidas, o Concello busca “garantir unha contorna segura para que todos e todas poidan gozar da festa na cidade”, explica o concelleiro de Seguridade, Antonio Fernández
O corpo municipal traslada recomendacións á cidadanía para realizar as compras e gozar dos eventos programados
A Policía Local do Concello de Ourense poñerá en marcha o dispositivo “Comercio Seguro” co obxectivo de mellorar a seguridade cidadá durante as festividades do Nadal. Este operativo centrarase nas zonas do centro urbano, áreas de lecer e espazos de grande afluencia, coincidindo cun período no que se espera un incremento significativo de visitantes. Ademais, implementaranse restricións temporais de circulación en diversas rúas céntricas da cidade.
Eventos como o Black Friday, o acendido das luces do Nadal e outras actividades da tempada implicarán unha grande concorrencia, polo que a Policía Local mobilizará recursos para garantir a seguridade. En caso de incidencias, contarase co apoio de servizos de emerxencia como ambulancias, Protección Civil e o corpo de Bombeiros.
Con este conxunto de medidas, o Concello busca garantir unha contorna segura para que todos e todas poidan gozar do Nadal en Ourense, explica o concelleiro de Seguridade Cidadá Antonio Fernández.
Resultados e valoración do dispositivo
Desde a súa instauración, este plan demostrou a súa eficacia, recibindo unha valoración positiva por parte de asociacións de comerciantes, pequenas e medianas empresas do sector e a cidadanía en xeral. A implementación do dispositivo contribuíu a reducir o risco de actos delituosos e foi recoñecida pola rapidez e eficiencia nas intervencións.
O concelleiro de Seguridade Cidadá destacou a importancia destas medidas, cualificándoas como esenciais para protexer tanto a cidadanía como o comercio local nun momento de alta afluencia. Segundo Fernández, unha parte do dispositivo xa está activa e todas as medidas serán de carácter transitorio.
Accións preventivas e colaboración cidadá
O operativo inclúe vixilancia específica en zonas comerciais mediante patrullas a pé e presenza de vehículos policiais, ademais do reforzo de seguridade durante eventos multitudinarios. Estas accións están aliñadas coas directrices da Subdelegación do Goberno e as instrucións do Ministerio do Interior, no marco da alerta antiterrorista de Nivel 4 vixente no país.
A Policía Local fai un chamamento á colaboración cidadá para asegurar o éxito do dispositivo e comprométese a informar os comercios e veciños afectados por cambios na circulación ou o transporte de mercadorías.
Prevención de delitos e consellos de seguridade
Como parte do plan “Comercio Seguro 2024/2025”, traballarase na prevención de delitos como furtos, roubos con violencia, roubos con forza e fraudes, tanto para comerciantes como para os seus clientes. Así mesmo, promoveranse recomendacións para realizar compras seguras e gozar dos eventos do Nadal sen riscos:
- Levar bolsos, carteiras ou mochilas na parte dianteira e ben pechados.
- Evitar portar grandes sumas de diñeiro en efectivo e só levar a documentación imprescindible.
- Manterse alerta ante comportamentos sospeitosos.
- Vixiar de preto nenas e nenos e proporcionarlles unha pulseira identificativa ou instruílos/as sobre que facer se se perden.
- Non mostrar á vista obxectos de valor como teléfonos móbiles ou cámaras.
- Non descoidar as pertenzas en ningún momento.
- Gardar carteiras ou móbiles en petos dianteiros con peche ou en petos internos.
- Ter precaución con persoas descoñecidas que tenten distraer a atención.
- Ter coidado ao retirar diñeiro en caixeiros automáticos.
- Revisar as pertenzas despois de estar nunha aglomeración.
